Konsolidimi i shtetit të Kosovës mbetet prioritet për Shqipërinë

nga **Rreze** Tue Feb 15, 2011 10:01 am

Prioriteti madhor i politikës së jashtme të Republikës së Shqipërisë është integrimi i vendit në Bashkimin Evropian dhe çështja e konsolidimit të shtetit të ri të Kosovës, ka deklaruar të hënën zv.kryeministri, njëherësh shefi i diplomacisë shqiptare, Edmond Haxhinasto, në analizën vjetore të Ministrisë së Jashtme. “Si rezultat i përpjekjeve dhe argumenteve të dhëna nga ana jonë, për herë të parë në cilësinë e Vëzhguesit, në aktivitetet e Kartës së Adriatikut mori pjesë edhe Kosova”.“Objektivi tjetër madhor i politikës së jashtme të vendit tonë dhe për rrjedhojë, i diplomacisë shqiptare si instrumenti parësor i zbatimit të saj, ka qenë dhe mbetet çështja e konsolidimit të pavarësisë dhe i shtetit të ri të Kosovës. Viti 2010, gjatë të cilit u shpall vendimi i Gjykatës Ndërkombëtare të Drejtësisë dhe u zhvillua diskutimi në kuadër të Asamblesë së Organizatës së Kombeve të Bashkuara, ishte periudhë kyç për konsolidimin e pavarësisë së Republikës së Kosovës”, tha ministri Hashinasto, njofton Zyra për informim e MPJ-së.“Diplomacia shqiptare ka punuar me prioritet dhe pa u kursyer për të siguruar sa më shumë mbështetje. Tipar shumë i rëndësishëm i kësaj pune ka qenë koordinimi i ngushtë i gjithë veprimtarisë me partnerët tanë kryesore, Shtetet e Bashkuara, Mbretërinë e Bashkuar, Francën, Gjermaninë dhe Italinë, Turqinë, dhe shume vende te tjera. Miratimi nga Asambleja e OKB-së e Rezolutës për Kosovën ishte një arritje edhe për diplomacinë shqiptare. Diplomacia shqiptare vlerëson se është jo vetëm në interes të shqiptarëve, por edhe të stabilitetit dhe sigurisë rajonale, që Kosova të mund të integrohet sa mirë në proceset, organizatat dhe nismat e bashkëpunimit rajonal”