Ndryshimet kushtetuese, BDI kushtëzon me Badinterin

Shkup, 18 shkurt - Ndryshimet kushtetuese në Maqedoni vihen në pyetje si rezultat i kushtëzimit të BDI-së, e cila ka kërkuar që parimi i Badenterit të aplikohet në Gjykatën Kushtetuese edhe në rastin e shkarkimit të gjykatësve. Në rast se nga VMRO-DPMNE nuk ka vullnet politik për t’i mbështetur këto kërkesa, jo zyrtarisht nga partia e Ali Ahmetit deklarojnë se nuk do t’i japin mbështetje ndryshimeve të propozuara nga grupi i deputetëve të VMRO-DPMNE-së, të cilat parashohin edhe largimin e ministrit të Drejtësisë nga Këshilli Gjyqësor Republikan.
“Brenda kësaj kornize propozuesi duhet të inkorporojë mënyrën jo vetëm të emërimit, por edhe të shkarkimit përmes parimit të Badinterit. Ne si grup parlamentar dhe si parti politike vlerësojmë se është një lëshim apo një zbrazëtirë që në këtë moment nga propozuesi duhet të kihet parasysh dhe të plotësohet kjo iniciativë”, tha Adnan Jashari, deputet i BDI-së, transmeton Alsat-M.
“Mendoj se duhet që të pranohet ky propozim për ndryshimin e Kushtetutës së Republikës së Maqedonisë dhe bashkë të bëjmë që të përforcohet pavarësia e pushtetit gjyqësor, të përforcohet pavarësia e entit shtetëror për revizion dhe të mundësojmë që njëkohësisht RM-ja të merr vlerësim pozitiv në raportin e ardhshëm të Komisionit Evropian”, tha Silvana Boneva, koordinatore e grupit parlamentar të VMRO-DPMNE-së.