Jep dorëheqje shefja e diplomacisë franceze.

Ministrja e Punëve të Jashtme e Francës Mishel Alio-Mari, pas një sërë skandalesh në të cilat ishte përfshirë, pas kthimit nga Kuvajti, ka dhënë dorëheqje të cilën ia ka ofruar me shkrim presidentit Nikola Sarkozi.
Lajmi është konfirmuar nga kabineti i presidentit të Francës. Alio-Mari ndodhej në Kuvajt me rastin e 20-vjetorit të çlirimit të vendit nga regjimi i ish-presidentit irakian Sadam Husein.
Disa ministra dhe zyrtarë të së djathtës të premten dhe të shtunën kanë paralajmëruar se shefja e diplomacisë së shpejti do të japë dorëheqje.
Ministrja franceze që nga fillimi i vitit ishte e përfshirë në aferën rreth fluturimit kontrovers në Tunizi kah fundi i vitit të kaluar dhe ofertës për bashkëpunim me policinë e ish-regjimit të presidentit Zin el Abidin Ben Ali, kur revolucioni në këtë shtet kishte filluar.
Presidenti francez sot pritet të mbajë një fjalim për situatën ndërkombëtare, të cilin do ta transmetojë televizioni shtetëror, thuhet në kumtesën e zyrës së Presidencës. Alio-Mari në postin e saj pritet ta zëvendësojë Alen Zhype, ministër aktual i Mbrojtjes.