Prangosen tre persona të dyshuar për vjedhje

Në pranga të Policisë së Kosovës kanë përfunduar të hënën rreth orës 06:00, në Prishtinë tre persona të dyshuar për një rast të vjedhjes së rëndë. Lajmi është konfirmuar zyrtarisht nga Brahim Sadriu, zyrtar për informim i PK-së, i cili për “ “Kosova Sot “ ka thënë se tre personat e dyshuar kanë kryer një vjedhje në rrugën e “UÇK-së”. Gjithashtu, policia te të njëjtit ka gjetur dhe konfiskuar edhe gjësende që dyshohen të jenë objekt i kësaj vjedhjeje. “Janë konfiskuar 5 kompjuterë, 5 shtëpiza, 1 telefon, një fotoaparat, tri USB-ja, çelësa dhe kabllo gjëra këto që dyshohet të jenë të vjedhura në një lokal në rrugën e “UÇK-së”, ka thënë Sadriu. Sipas tij është bërë e ditur se pas marrjes së autorizimit nga ana e prokurorit njëri nga të dyshimtit që i takon moshës së mitur është liruar. Rasti ndaj tij shkon në procedurë të rregullt, ndërsa dy të tjerët: A. Salihu dhe Q. Duraku që të dy të moshës së njëjtë, 18 vjeç janë dërguar në qendrën e paraburgimit në Prishtinë.