Topalli përshëndet arrestimin e Mlladiç

Kryetarja e Kuvendit, Jozefina Topalli përshëndeti të enjten arrestimin e kriminelit serb të akuzuar për krime lufte, Ratko Mlladiç.
“Arrestimi i kasapit të Bosnjës dhe Hercegovinës Ratko Mladic, njërit prej figurave me te zeza dhe kriminale te Ballkanit është nje lajm i shumëpritur jo vetëm për qytetarët e Bosnje Hercegovinës, por për te gjithë qytetaret e Evropës, e më tej", thuhet në mesazhin e shpërndarë nga zyra e shtypit e kryetares së parlamentit.

"Gjykimi i tij nga Gjykata e Hagës është një lajm i mirë edhe për të afërmit e viktimave, të cilët përjetuan genocidin ne zemër te Evropës. Sot të gjithë këta familjarë që kanë humbur të dashurit e tyre nga terrori i Ratko Mladicit janë pak më të lehtësuar, sepse sot pas 16 vitesh ato mund të shpresojnë tek drejtësia. Kjo është një dite e shënuar për të mbyllur një kapitull te kobshëm te historisë se trishtueshme të shkaktuar nga kriminelët në Ballkan”, tha zonja Topalli.