Bombë në Turqi, shtatë të vrarë

Autoritetet turke njoftuan se nga eksplodimi i një bombe janë vrarë pesë policë dhe dy civilë në pjesën juglindore të Turqisë.Duket
se një makinë e policisë ishte cak i këtij sulmi në qytetin Gurojmak në
provincën Bitlis. Civilët e vrarë udhëtonin me një kamion prapa
policisë, raporton RFE.

Nga një sulm tjetër me bombë, në provincën Mardin, në pjesën
jugliondore të Turqisë, është plagosur një ushtar. Forcat e sigurisë po
kërkonin për sulmuesit në këtë hapësirë, që besohet se ishin anëtarët e
Partisë Punëtore të Kurdistanit.

Sulmet nga kryengritësit e kësaj partie janë pothuajse të zakonshme
në pjesën lindore dhe juglindore të Turqisë. Partia Punëtore e
Kurdistanit, që nga Turqia dhe pjesa më e madhe e bashkësisë
ndërkombëtare konsiderohet organizatë terroriste, në vitin 1984 i mori
armët në duar, në pjesën juglindore të Turqisë, e banuar me popullatë
shumicë kurde, duke shkaktuar konflikt, nga i cili janë vrarë afro 45
mijë vetë.