Shimpanzetë mund të kuptojnë shqipen

Shimpanzetë mund të jenë në gjendje të mësojnë gjuhët e njeriut, bëri të ditur një
studim i cili rrezikon të përgënjeshtrojë dekada pune për njohjen më të
mirë të specieve.

Primatët, në të cilin përfshihen majmunët më të
evoluar si shimpanzeja apo orangutangu, janë kafshët më inteligjente në
planet. Midis gjitarëve, vetëm njeriu dhe primatët arrijnë për shembull
të dallojnë veten e tyre në pasqyrë. Kafshët e tjera reagojnë ndaj
imazhit të tyre sikur të kishin përballë dikë tjetër.

Kështu, deri më sot besohej se ata që reklamohen si “paraardhësit” tanë
ndryshonin prej nesh pasi nuk kishin mundësinë të artikulonin dhe të
flisnin nëpërmjet fjalive të ndërlikuara.

Diçka e tillë mund të jetë e pavërtetë dhe jo vetëm kaq, por primatët mund të jenë në gjendje
të kuptojnë me praktikë edhe atë që dy qenie njerëzore janë duke
biseduar midis tyre, pavarësisht gjuhës. Kështu, ata mund të arrijnë të
kuptojnë edhe shqipen, nëse qëndrojnë shumë kohë duke e dëgjuar.

Një grup shkencëtarësh kanë parë se shimpanzetë e trajnuara që në moshë të
vogël, arrijnë të zhvillojnë këtë aftësi perceptimi dhe të kuptimit të
species sonë.

Nëse diçka e tillë verifikohet, atëherë diferencën
midis njeriut dhe primatëve nuk e bën inteligjenca jonë e shtuar, por
thjesht praktika e komunikimit, diçka që shimpanzetë nuk kanë nevojë ta
zhvillojnë ashtu si ne.

Kodi gjenetik i njeriut dhe i majmunëve është i njëjtë në 99% të tij.