Fundi i botës nuk do të ndodhë më 2012!

Fundi nuk është afër. Të paktën kështu thotë një ekspert gjerman
i cili thotë se ka dekoduar shkrimet e qytetërimit Maya që kanë të
bëjnë me vitin 2012. Sipas tij, këto shkrime paralajmërojnë tranzicionin
në një periudhë të re dhe jo fundin e mundshëm të botës siç kanë
paralajmëruar shkencëtarët tjerë. Interpretimi i ekspertit
të hieroglifëve, Sven Gronemeyer, nga Universiteti La Trobe në Australi,
është prezantuar për herë të parë të mërkurën në një vend arkeologjik
të Palenques në Meksikë.

Gronemeyer ka studiuar tabletat e gurit të gjetura vite më parë në
vendin arkeologjik të Tortugueros në Tabasco të Meksikos. Ai tha se në
këto hieroglifë është përshkruar kthimi i zotit misterioz të Mayave,
Bolon Yokte, në fund të periudhës së 13-të të 400 viteve, i njohur si
Baktnus, që është ekuivalent me 21 dhjetorin e vitit 2012.

“Mayanët e konsideronin numrin 13 si të shenjtë. Nuk ka asgjë apokaliptike në këtë datë”, tha shkencëtari.

Teksti është skalitur në gurë para 1300 vitesh. Guri është
plasaritur, duke e bërë fundin e shkrimit gati të palexueshëm.
Gronemeyer tha se shkrimi i referohet fundit të ciklit prej 5.125
viteve, që prej fillimit të kalendarit të Numërimit të Gjatë të Mayave
në vitin 3113 para Krishtit.

“Fragmenti ishte profeci e sunduesit të asaj kohe Bahlam Ajaw, i cili dëshironte të planifikonte shtegtimin e zotit”.

“Për elitën në Tortuguero, ishte e qartë se ata duhej ta bënin gati
tokën për kthimin e zotit ndërsa për Bahlam Ajwan të ishte nikoqir i
këtij kthimi”, shton ai.

Bolon Yokte, zoti i krijimit dhe luftës, pritej të paraqitej atë ditë në vendin e shenjtë të Tortugueros.

“Data paraqet një vlerë simbolike sepse është parë si reflektim i
ditës së krijimit”, mendon Gronemeyer. “Është një shtegtim i një zoti e
jo domosdoshmërish një hap i madh për njerëzimin”.