Në Shkup disa të lënduar, një i therur me thikë

Shkup, 13 shkurt - Disa persona janë lënduar mes të cilëve një rënd në protestën e sotme të shqiptarëve dhe maqedonaseve pro dhe kundër ndërtimit të kishës në Kalanë e Shkupit, raporton KTV. Sipas informatave nga terreni, një protestues maqedonas i thirrur me thikë është në gjendje të rëndë shëndetësore. Përleshja mes protestueseve ka ardhur pas provokimeve të protestueseve maqedonas, të cilët kanë filluar të gjuanin me gurë, ndërsa pas ndërhyrjes së policisë maqedonase, situata është qetësuar. Ende nuk ka njoftim zyrtar për të lënduarit. Në turmën e protestuesve është goditur nga policia edhe kreu i Lëvizjes “ZGJOHU!”, Artan Grubi, i cili ka tentuar që të qetësojë radhët e para të protestuesve. Në vendin e ngjarjes ka dalë edhe zëvendësministri i brendshëm, Xhevat Buçi si dhe deputetë të BDI-së, kryetari i BDK-së, Hysni Shaqiri, të cilët ia kanë arritur që të ulin tensionet. Aktivistët e Lëvizjes “ZGJOHU!” janë futur në brendi të Kalasë dhe kanë vendosur pankarta në mbrojtje të Kalasë. Eskalimi i situatës ka nisur pas vendimit të Ministrisë së kulturës për të ndërtuar një kishë muze mbi Kalanë e Shkupit, e cila siç u tha po bëhet në themelet e një kishe të rrënuar nga shekulli 13. Ndërsa kryeministri Nikola Greuvski lidhur me rastin në Kala të Shkupit, ka kërcënuar sot subjektet politike shqiptare - BDI-në dhe DR-në. Gruevski ka thënë se si kryeministër nuk do të lejojë që dikush për qëllim të përfitimeve të pikëve politike të krijojë tensione mes njerëzve dhe të rrënojë objekte, të cilat, sipas tij, janë trashëgimi kulturore.