Humbje e thelle e LDK-se ne Gjilan

Bota iu shemb LDK’së mbrëmë në
Gjilan. Fatmir Rexhepi u mund për të tretën herë. Kësaj radhe, me mbi
5.000 vota më shumë. Me fitoren e Qemajl Mustafës, PDK konfirmoi më tej
fuqinë e saj politike. Qytetarët nuk përtuan të dalin, ndërsa procesi
zgjedhor u vlerësua përgjithësisht i rregullt.

Partia Demokratike e Kosovës ka ndezur
fishekzjarrët në Gjilan, të dielën mbrëma, pak orë pasi që u mbyllën
kutitë e votimit, në të cilat qytetarët e thanë për të treten herë
fjalën e tyre brenda pesë muajve.

Njerëzit mbushën sheshin kryesor të qytetit, duke brohoritur emrin e njeriut që do t’i udhëheq për katër vitet e ardhshme.

Kandidati
i PDK’së, Qemajl Mustafa u konfirmua fitues, përballë rivalit nga
Lidhja Demokratike e Kosovës, Fatmir Rexhepi, në të cilin Fatmir Sejdiu
i kishte varur shpresat e fundit “për një fitore morale”.

Por jo.

LDK,
të dielën, sërish humbi në Gjilan, për të tretën herë, ashtu sikurse
humbi tri herë edhe në Prizren dhe Lipjan. Pavarësisht që kandidati i
saj mbështetej edhe nga AAK dhe LDD.

Rezultatet preliminare, të
shpallura nga Komisioni Qendror Zgjedhor dhe Koalicioni “Demokracia në
Veprim”, vërtetuan fitoren e PDK’së, e cila në Gjilan mbështetej edhe
nga AKR dhe ORA.

KQZ, pas mesnatës, i ka publikuar rezultatet e saj preliminare.

Kryetarja
e KQZ’së, Nesrin Lushta tha se PDK ka marrë 20.071 vota ose 58 për
qind. Derisa LDK, sipas saj, ka marrë 14.506 vota ose 42 përqind.
“Këtu
nuk janë llogaritur votat me kusht. Besoj se brenda javës do t’i kemi
rezultatet përfundimtare”, tha Lushta, në një konferencë për media.
Rezultate të ngjashme ka dhënë edhe “Demokracia në Veprim”.

Ky
koalicion njoftoi se PDK ka fituar në Gjilan me një diferencë prej
5.100 votave epërsi ndaj LDK’së. Sipas të dhënave të publikuara nga
“Demokracia në Veprim”, PDK ka fituar 58.1 për qind të votave, kurse
LDK 41.9 për qind. Konfirmimin e fitores së PDK’së, zyrtarët e
“Demokracisë në Veprim”, e kanë bërë gjatë një konference për media, me
ç’rast kanë treguar se kandidati i PDK’së, Qemajl Mustafa, ka marrë
gjithsej 19 mijë e 852 vota, ndërsa ai i LDK’së, Fatmir Rexhepi, 14
mijë e 306 vota.

Paraprakisht fitorja e PDK’së në Gjilan është shpallur nga Zëvendëskryeministri Hajredin Kuçi.

“Kryetari
i tanishëm, Qemajl Mustafa edhe për katër vitet e ardhshme do t’i prij
Gjilanit, sepse ka gëzuar mbështetjen e plotë të qytetarëve me mbi 5
mijë vota përballë kundërkandidatit të tij. Qytetarët e Gjilanit sot
treguan nivel të lartë të pjekurisë demokratike”, ka thënë Kuçi.

Kandidati i PDK’së, Qemajl Mustafa duke shpallë fitoren e tij ka gjuajtur me fjalë kundërkandidatin nga LDK.

“Me
këtë fitore është përmbytur një jugo-mentalitet. Është përmbytur edhe
Fatmiri lokal edhe Fatmiri President”, ka thënë Mustafa.

Fatmir Rexhepi ka pranuar humbjen, po ashtu, me fjalë të këqija për PDK’në.

“Kësaj
radhe nuk ka fituar demokracia, por ka fituar PDK’ja. U ble demokracia,
fitoi mielli dhe sheqeri. Pra, fituan me pehlivana dhe jovana”, ka
thënë Rexhepi.
Mustafa, ndërkaq, ka thënë se nuk ka pranuar ndonjë
telefonatë nga rivali, duke theksuar se ka probleme me kartelën e
telefonit. Sidoqoftë, ai ka thënë se pret një thirrje nga Rexhepi
ditëve në vazhdim.

Rivaliteti i dy kandidatëve, i cili
zgjatuar që nga tetori i vitit të kaluar, ka vazhduar menjëherë pas
mbylljes së vendvotimeve. Mustafa e Rexhepi në përgjithësi kanë folur
për një proces të rregullt zgjedhor, por nuk kanë lënë pa sulmuar njëri
tjetrin.

“Ai mund t’i bëjë qejf vetit sepse ai as nuk ka qenë
kryetar e as nuk do të jetë”, ka thënë kandidati i LDK’së, disa çaste
pas mbylljes së vendvotimeve.

Parregullsi...
Procesin
zgjedhor të së dielës në Gjilan e kanë përshkuar një varg parregullsish
nëpër vendvotime të ndryshme. Kjo është konstatuar nga subjekte të
ndryshme të cilët e kanë vëzhguar nga afër procesin zgjedhor në Komunën
e Gjilanit.

Në orët e mbrëmjes kandidati i LDK’së ka akuzuar
kampin e PDK’së për kontrabandim të 420 votave të komunitetit serb. Por
Rexhepi është shprehur i bindur për fitore.

Gjilani, të dielën, është vizituar edhe nga diplomatët perëndimorë.

Ambasadori
amerikan, Christopher Dell ka thënë se, gjatë vizitës së tij në njërën
nga vendvotimet, ka dëgjuar për ankesa të aktivistëve, por ka theksuar
se “nuk është gjetur asgjë”.
Megjithatë, disa shkelje janë
konstatuar nga Ambasadori britanik në Kosovë, Andy Sparks. Diplomati
britanik ka thënë se në përgjithësi procesi ka shkuar mirë, por sipas
tij, janë vërejtur parregullsi si dhe prania e personave të “papunë” në
vendvotime.
Shkeljet janë evidentuar përmes raporteve edhe nga
koalicioni “Demokracia në Veprim”, e cila ka folur për votimet
familjare, raste të fotografimit te votave si dhe për prezence të madhe
të personave te paautorizuar në vendvotime.

“Në fshatin
Pogragjë, është evidentuar një rast ku një person ka votuar në emër të
të vdekurve. Po ashtu, në këtë fshat ka pasur edhe votime të hapura,
ndërkohë një polici i uniformuar ka votuar në mënyrë të hapur”, thuhet
në njërën nga komunikatat për media të koalicionit demokracia në veprim.
“Ndërkohë
në Shkollën Musa Zajmi, janë vërejtur katër (4) raste të votimeve
familjare. Raste të tilla si dhe votime të shumta me asistencë janë
vërejtur edhe në Përlepnicë dhe Dobërçan”.

Pjesëmarrje e vogël e serbëve

Në
votimet e së dielës në Gjilan kanë dalë edhe pjesëtarë të komunitetit
serb. Pjesëmarrje më e madhe e votuesve serbë është vërejtur në fshatin
Pasjan. Përfaqësues të këtij fshati kanë theksuar se procesi zgjedhor
është zhvilluar pa probleme, duke përmendur disa ankesa të vogla.
Megjithatë Nenad Cvetkovic, përfaqësues i këtij fshati, ka deklaruar se
nëpër këtë fshat kanë kaluar disa vetura me flamuj të LDK’së të cilët
njëherësh kanë shpërndarë fletushka, çka sipas tij, përbën kërcënim për
votuesit. Votimet janë zhvilluar edhe në fshatra të tjera serbe të
Komunës së Gjilanit, por me një përqindje të ulët të daljes së
komunitetit serb. Sipas Komisionit Qendror të Zgjedhjeve qendra votimi
për serbët janë hapur edhe në fshatrat Budrikë dhe Cernicë, por deri në
orët e mbrëmjes nuk ka pasur votues. Po ashtu, edhe në fshatin Shillovë
është vërejtur një dalje vogël e serbëve në votime.