Si t’i njohim shoqet e shtirura

Një shprehje e vjetër thotë “Kush gjen një mik, gjen një thesar”.
Është e vërtetë. Por ndonjëherë këto lloj lidhjesh emocionale mund të na
“helmojnë” jetën, duke arritur në një hidhërim të plotë. Më poshtë do
të lexoni se cilët janë shoqet dhe shokët “e rrezikshëm”, prej të cilëve
duhet të distancoheni dhe të kemi shumë kujdes.

Mashtrueset
Shoqe jo korrekte dhe tek e cila nuk mund të mbështeteni: janë ato
vajza që anulojnë gjithnjë takimet tuaja në momentet e fundit. Ndërsa ju
jeni duke e pritur për të drekuar me të ajo thotë se nuk mund të vijë,
pasi e kanë mbytur punët dhe nuk e di nëse do të lirohet. Kjo shoqe
asnjëherë nuk ju gjendet pranë në momente të vështira, e aq më pak kur
do t’ju duhet t’i besoni një punë, të cilën ju nuk mund ta kryeni vetë.
Të ngjiturat
Është një nga ato tipa shoqesh që nuk ju ndahen në asnjë sekondë të
ditës. Pretendon se është e përfshirë në jetën tuaj në çdo aspekt: me
pak fjalë miqtë tuaj bëhen edhe të asaj; shtëpia juaj është dhe e saja.
Mos u habisni që një ditë kur të ktheheni në shtëpi, ta gjeni atë duke
ju bërë edhe punët, pastaj t’iu thotë: “Kalova këtej dhe desha të të bëj
një surprizë”. Ajo mund të bëhet një pengesë për jetën tuaj intime.
Të llastuarat
Ankohen gjithnjë dhe kanë tendencën e vetëshkatërrimit, pavarësisht
se është krejtësisht e pafajshme: në një moment ankohet se nuk mund të
gjendet një mashkull interesant për të, ndërkohë që pak çaste më vonë ju
tregon se është duke shkuar me 3 meshkuj njëherësh. Ju thotë se nuk
mund të dalë me ju për pica, sepse është duke mbajtur një dietë të
fortë, e pak çaste më vonë shfaqet me një tas të madh me akullore. Është
e bindur se ndiqet nga fati i keq për gjithçka.
“Debilet”
Kujdes, është rrezik! Këto shoqe mund t’ju heqin besimin që keni në
vetvete. Në filmat amerikanë një shoqe e tillë personifikohet si
‘cheerleader‘ bionde, dhe me një fizik shumë të bukur. E dashura e më të
“fortit” të shkollës dhe gjithnjë e rrethuar nga vajza të tjera që e
shikojnë atë si model. Pra me pak fjalë e keni kuptuar se për çfarë tipi
bëhet fjalë.
Xhelozet
Maskën e saj të xhelozisë e vesh gjithnjë. Është gjithnjë e
sjellshme, e shoqërueshme dhe e gatshme për gjithçka. Nuk thotë kurrë jo
dhe nuk jua kthen asnjëherë fjalën. Është e lindur për t’i bërë të
lumtur të tjerët, të paktën nga pamja e jashtme. Por kur ju të gjeni një
të dashur ajo në pak minuta ju bën biografinë e tij. Sepse, sipas saj,
meshkujt në qarkullim, përveç të vetit, janë të gjithë pemë pa kokrra.
Dorështrënguarat
Është më se normale që në shoqëri të shfaqen edhe shoqe të tilla, të
cilat, për arsye të çuditshme harrojnë gjithnjë çantën në shtëpi dhe
kanë gati fjalinë klasike: “Paguaj ti sot, herën tjetër e kam unë”. Por
asnjëherë nuk i bie ndërmend që t’ju ofrojë një kafe.