Çfarë di unë për abortin, “biseksualizmin” dhe të dashurin e vajzës sime

Erdhën thjesht për të kaluar ndërrimin e viteve në Tiranë, dhe planet
u ndryshuar rrugës. Nuk ngurron t’i çojë më tej sekretet e vajzës së
saj, ndër konkurrentet më të hapura në BB4. Arta Hysko, nëna e Elisa
Çaushit ,rrëfen se si e bija u bë pjesë e këtij “reality show”. Pas 12
vitesh që kishte jetuar në Londër me dy vajzat e saj dhe divorci nga
bashkëshorti, ajo mendon për një rikthim në Shqipëri. Për Elisën, ajo ka
shumë për të thënë. Nga marrëdhënia e saj me babain e divorcuar, aborti
para dy vitesh, dhe të dashurin që ka lënë jashtë shtëpisë, Arta Hysko i
zbulon më tej në këtë intervistë për “Panorama Plus”.

Pas eksperiencave në fushën e modës dhe në një gare bukurie në vitin
2007 në Angli, vajza juaj hyn në një “reality show” si BB. Pse vendosi
Elisa të bëjë këtë aventurë televizive?

Në fakt ne kishim një ofertë që na erdhi nga një mik i familjes për
të festuar Vitin e Ri në Shqipëri. Pas një udhëtimi për 48 orë nga
Londra, mbërritëm në mëngjesin e datës 26. Në datën 28 në mbrëmje, unë
dhe Elisa hymë në një kafe-internet dhe Elisa me tha që ishin duke
vazhduar aplikimet për “Big Brother Albania”. Pasi u konsultuam aty për
aty, e bëri aplikimin online. Sapo dolëm te dera internetit morëm
telefonatën nga “Top Channel”për të bërë audicionin që më pas e fitoi.
Para se të hynte në lojë, fjalët e saj ishin: “Kam shumë për të dhënë
dhe dua të marr shumë. Dua të përjetoj dhe eksperiencën në BB4 për t’u
përballur me realitetin shqiptar, këtë herë në një mënyrë tjetër”.

Në rrëfimet e saj, Elisa nisi te tregonte historinë e jetës në Angli,
ku përmendi divorcin e prindërve, pa u thelluar në detaje. Çfarë ndodhi
mes jush pas largimit në Angli?

Jeta atje ishte shumë e ashpër dhe për ne ishte një eksperiencë e re.
Duke e përjetuar shumë keq rritjen e dy vajzave e vetme dhe pa asnjë
përkrahje nga i ati i tyre, i cili në atë kohë nuk punonte dhe iu fut
alkoolit, pasi ndiente mungesën e familjes së tij si dhe ikjen jashtë,
me mirëkuptim bëmë ndarjen. Më pas ai u fejua me një grua tjetër pas
gjashtë muajsh dhe mesa di, ata tani jetojnë të lumtur si çift. Kam
pasur relata shumë të mira me të dy. Gruaja e tij aktuale më ka
respektuar dhe më ka përkrahur, qoftë dhe në problemet e mia. Më është
gjendur dhe kur kam pastur probleme shëndetesore duke më shoqëruar në
spital.

Cila është marrëdhënia e Elisës me të atin, sepse dukej sikur kishte një brengë…

Elisa dhe Eni (vajza më e vogël) u prekën shpirtërisht, kur i ati
kishte 50 vjetorin dhe pas një ftese të refuzuar prej tij nuk folën me
të. Me gjithë përpjekjet e mia Elisa kontaktoi në telefon me të, por jo
si herët e tjera.U fye në fakt, por Elisa është vajzë inteligjente dhe
unë jam shumë e sigurt që të dyja do e falin dhe do i gjenden babait të
tyre në çdo moment ashtu si dhe ai.

Gjithashtu ajo ka pohuar se ka abortuar një fëmijë në Angli. Ishit në dijeni të këtij fakti dhe çmund të thoni më shumë?

Unë jam në dijeni të gjithçkaje që i ndodh sime bije. Jam shumë e
afërt me vajzat e mia dhe s’kemi kufizime ose prapaskena në çdo gjë që
bëhet ose ndodh. Elisa ishte në lidhje me një djalë dhe të dy duheshin
shumë. Por në atë atë kohë ajo po bënte kurse kualifikimi dhe ishte e
preokupuar të bënte punën dhe kurset në të njëjtën kohë. Kjo ishte
arsyeja që ajo vendosi të mos e mbante fëmijën. Për çfarë është thënë
deri tani dua të sqaroj se Elisa e di shqipen, po shumë herë nuk e gjen
fjalën e duhur dhe në këtë rast e kanë keqinterpretuar atë që ajo ka
thënë në lidhje me abortin. Fjalët e saj ishin: “Ai nuk mori
përgjegjësinë për fëmijën, por jo se ai nuk njohu atësinë. Ai thjesht
mendonte se ishte herët për të marrë një vendim të tillë dhe mbaj mend
t’i ketë thënë Elisës: “Dua që të mbarosh këto që ke nisur,
universitetin dhe pastaj të bëjmë martesë dhe të nisim jetën. Je shumë e
re për ta nisur jetën me një fëmijë. » Unë isha dakort me të dhe e
përkraha Elisën në vendimin që mori.

Duket se Elisa është një nga vajzat më të hapura në këtë show, ku
vjen puna për të treguar edhe të fshehta si ky i abortit. Nuk të duket e
tepërt kjo?

Elisa është e çiltër dhe nuk fsheh asgjë. Këtë mbase e keni kuptuar
dhe ju tashmë nga çiltërsia me të cilën ajo flet dhe tregon në BB4.
Mbase njerëzit e quajnë të tepërt, por unë jam ajo që i kam treguar në
jetë se, “çiltërsia” është virtyt, që ka vlera te njeriu.

Ajo ka folur po ashtu se kishte një lidhje para se të hynte në BB me
një djalë që quhet Fatjon. Bëhet fjalë për ndonjë lidhje stabël?

Elisa është në një moshë që askush s’e detyron në zgjedhjet e saj.
Mua thjesht më tregon për çfarë i ndodh dhe kërkon të dijë mendimin tim
si nënë. Për lidhjen esaj jam në dijeni. Është një lidhje e re dhe e
bukur. Më shumë s’kam ç’mund të them.

Si e sheh lojën e Elisës deri tani ? Është ajo vajza që ke njohur?
Me cilin nga djemtë do t’ju pëlqente të krijonte intimitet dhe me cilin
jo kategorikisht?

Të them të drejten nuk e kam ndjekur shumë, pasi nuk i kam kushtet
këtu ku jam për momentin. Ndjek të gjitha ngjarjet dhe lajmet që japin
për të, në përmbledhjet e BB4 si dhe nga gazetat. E thashë më sipër,
Elisa është në një lidhje dhe nuk është futur me qëllim lidhjeje. Për
mua të gjithë djemtë janë të mrekullueshëm dhe secili me natyrën e vet
ka sjellë diçka të re në BB4.

Por kemi parë të jetë afruar më shumë me Algenin, do t’ju pëlqente ky banor për të krijuar afrimitet me vajzën tuaj?
Elisa është e komunikueshme dhe shumë e afërt, ka shume miq, e duan
shumë dhe e konsiderojnë si motrën e tyre. I falënderoj të gjithë miqtë e
saj të Facebookut si dhe gjithë shqiptarët, të cilët e votuan si të
preferuarën e tyre.

Synimi kryesor i Elisës është të fitojë paratë, apo famën duke bërë protagonisten?

Elisa është shumë e thjeshtë, fama s’i ka hyrë kurrë në sy. Ka bërë
parada mode dhe gjithmonë me kokën lart e ka prezantuar vetveten si
shqiptare. Siç jua shpjegova më lart ishte thjesht një provë për të
provuar shansin dhe për të marrë një eksperiencë nga Shqipëria e saj, që
ajo e do me shpirt.

Një koment mediatik e ka quajtur “bisekusale”...

Po, këtë lajm ma kanë njoftuar me mesazh në telefon. Elisa ka thënë
thjesht që, “i puth shoqet, siç puth mamin në buzë dhe ato kanë pohuar
“biseksualja e BB”. S’më erdhi mirë. Unë e njoh vajzën time dhe jam një
nënë me mentalitet shqiptar, që i ruaj traditat. Erdhi për të marrë një
eksperiencë dhe me dëshirën, që bukurinë dhe inteligjencen e saj t’ia
dhurojë këtij populli jo Anglisë dhe është shumë e rëndë për të dhe
gjithë familjen time të lexojnë gjëra të tilla. Por Elisa është shtetase
angleze dhe ligji e mbron.

Hyrja e saj në BB4, ndoshta ka qenë një arsye për një rikthimin përfundimtar tuaj në Shqipëri?

Të dyja vajzat e mia vijnë me mall dhe e përjetojnë shumë keq
kthimin, duke krahasuar harenë e këtushme me zymtësinë e Londrës,
shijimin e plazhit dhe detin e mrekullueshëm me oqeanin e ftohtë dhe
jetën e akullt të Londrës. Ato janë të gatshme të tregojnë për
Shqipërinë e tyre të dashur në çdo moment dhe kohë.