Wikipedia kërkon femra të cilat do ta redaktojnë enciklopedinë

Enciklopedia e lirë online Wikipedia kohë më parë ka festuar dekadën e parë të ekzistimit. Bashkëthemeluesi dhe fondacioni Wikimedia, e cila udhëheqë me Wikipedian, tanimë kanë përcaktuar qëllimet për 10 vitet e ardhshme. Mirëpo, hapi i parë është të tërheqin sa më shumë femra të cilat do të shkruanin artikuj dhe të plotësonin enciklopedinë.

Mbi 85 për qind të artikujve në Wikipedia janë shkruar nga meshkujt dhe mu për këtë Fondacioni Wikimedia dëshiron të përfshijë sa më shumë femra.

Në deklaratën e tyre kanë theksuar se nuk bëhet fjalë vetëm për përfaqësim të barabartë të gjinive, por para së gjithash këtë e bëjnë për përmirësimin e kualitetit të teksteve.

“Dëshirojmë të përmirësojmë përmbajtjen e Wikipedias. Secili sjellë pjesën e vet të informacionit në tavolinë”, ka thënë drejtoresha ekzekutive e fondacionit Sue Gardner.

Nga fondacioni kanë theksuar se në periudhën e ardhshme do të bëj disa ndryshime për të thjeshtuar redaktimin e enciklopedisë së lirë, dhe se me këtë do të tërheqin numër më të madh të njerëzve të cilët do të japin kontributin e tyre në shkrimin e teksteve. Në mesin e vullnetarëve do të duhej të ishin më së paku 25 për qind femra, transmetojnë mediet britanike.