Gjyshja (61 vjeçare) lindi nipin e saj

Të lindësh në moshën 61 vjeçare në vetvete është e pabesueshme, por Kristine Casey jo vetëm se lindi në atë moshë, por solli në këtë botë nipin e saj.
Casey është gruaja më e vjetër që ka lindur ndonjëherë në Illinois, pas menopauzës arriti ta lindë një fëmijë të shëndetshëm. Vajza e amerikanes dhe dhëndëri i saj po përpiqeshin që shumë vite të lindnin një fëmijë por pa sukses. Sara Connell që në vitin 2004 kishte filluar përpjekjet për të mbetur shtatzënë.

U vërtetua se ajo s’mund të mbeste shtatzënë me rrugë natyrale dhe vendosi për mbarsim artificial. Herën e parë mbeti shtatzënë me binjakë, por të dy lindën të vdekur, ndërsa herën e dytë pati një abort spontan.

Mu për këtë arsye kërkoi ndihmën e nënës së saj, e cila shtatzëninë e fundit e kishte kryer para 30 vitesh. Sara dhe bashkëshorti i saj Bill janë prindër biologjik të foshnjës, ndërsa Kristine Casey vetëm se ka bartur embrionin e krijuar nga qeliza vezë dhe sperma e qiftit.

“Kur pashë foshnjën së pari fillova të qajë. Kjo është një mrekulli e madhe”, tha Sara Connell për gazetën “Chicago Tribune”. Gjatë lindjes nuk ka pasur kurrfarë komplikimi. Qifti më në fund është i lumtur për fëmijën e lindur, por me siguri se do të ballafaqohet me probleme kur djali pasi të rritet do të fillojë të kërkojë sqarime se si ka ardhur në këtë botë. /Telegrafi/