Superkompjuteri Mira nga IBM

Kaliforni, 15 shkurt - IBM ka paralajmëruar superkompjuterin e ri të bazuar në arkitekturën BlueGene, të cilin do ta krijojë për nevojat e Argonne National Laboratory të Qeverisë amerikane.
Superkompjuteri i quajtur Mira do të ketë 750.000 bërthama që do t’i sigurojnë performanca maksimale prej 10 Pflop/s, përkatësisht 10 biliardë operacione me presje dhjetore në sekondë. Këto performanca janë përafërsisht dyfish më të mira se superkompjuteri më i fortë tani për tani në botë, Tianhe-1A kinez, i cili ka performansa maksimale prej 4,7 Pflop/s.
IBM tani për tani nuk jep shumë detaje për superkompjuterin Mira, por vetëm theksojnë që hulumtuesit do të duhet të shkruajnë aplikacione ashtu që të mund të shfrytëzojnë të gjitha 750.000 bërthamat për të shfrytëzuar mundësitë e Miras. Po ashtu thuhet që superkompjuteri i ri jo vetëm që do të jetë një ndër më të shpejtët në botë, por edhe që do të jetë energjetikisht më efikasi, por nuk u dhanë informata se kur do të mund të fillojë punën.