Nëna e Charlie Chaplinit ishte cigane

Londër, 21 shkurt – Një letër sekrete e gjetur në vendlindjen e pionierit të filmave pa zë, Charlie Chaplin më në fund doli në dritë. Në kë dokument të rëndësishëm thuhet se komiku i famshëm ka gënjyer për origjinën dhe se ai në të vërtetë ka lindur në një karvan ciganësh (romësh).
Njëri prej ikonave më të mëdha të shekullit të 20-të, kishte pranuar këtë letër gjashtë vjet para vdekjes së tij, por e kishte fshehur në sirtar. Të dhënat që Chaplini i ka përmendur në memoaret e veta se ka lindur më 16 prill të vitit 1889 në Londër nuk janë të vërteta, sepse në dokumentin e gjetur shkruan se ai ka lindur në një karvan në qytetin Smettwick, afër Birminghamit në Anglinë qendrore.
Letra është gjetur në sirtarin që nga Chaplini e ka trashëguar e bija e tij Victoria, e cila kishte thirru bravapunuesin për ta hapur pasi sirtari ishte i mbyllur me çelës. Sirtarin asaj ia kishte dërguar një person i quajtur Jack Hill nga Tamworthi, i cili kishte shkruar se për origjinën e aktorit me famë kishte marrë vesh nga tezja e vet.
“Karvani i takonte mbretëreshës rome, e cila ishte tezja ime. Ti ke lindur në “Black Patch” në Smethwick afër Birminghamit” kishte shkruar Hill.
“Black Patch” ishte lagje karvani nga epoka e industrializimit në Birmingham në vitin 1880. Certifikata e lindjes së Charlie Chaplinit nuk është gjetur kurrë, edhe pse nga fundi i vitit 1880 nxjerrja e saj ishte obligim ligjor.
Sipas pohimeve të Hillit, nëna e Chaplinit, Hana, mbiemri i vajzërisë së cilës ishte Hill, ishte pasardhëse e familjes “udhëtuese”. Ajo ka punuar si këngëtare dhe aktore me emrin artistik Lily Harley, kurse burrin e saj të quajtur Charlie e kishte braktisur kur Charlie Chaplini i vogël kishte vetëm 3 vjet.
Për çfarë arsyeje e ka fshehur komiku origjinën e tij? Aktori pas emigrimit në Amerikë vazhdimisht thoshte se është nga Londra, ndërsa besohet se ai e ka fshehur origjinën e vet për shkak se i ka ardhur turp.
Kjo letër është vetëm një nga dokumentet për komikun e famshëm që ruhet në trezor në Montreux në Zvicër, vendi ku tashti jetojnë të afërmit e tij.
Këtu gjenden gjithashtu edhe tekste nga gazetat lidhur me atë se si në ushtrinë britanike ka qenë e ndaluar të kishin mustaqe si Chaplini gjatë kohës së Luftës së Parë Botërore, si dhe xhirimi se si aktori me famë performon në piano.