Berisha: Rama rruga e bllokimit, ne rruga e zhvillimit

Kryeministri Berisha ftoi të premten qytetarët e Vlorës të votojnë kandidatin Partisë Demokratike për bashkinë e qytetit të Vlorës, Ardian Kollozin, pasi për të vlonjatët dhe Vlora janë e do mbeten të parët.
Kryeministri tha se Ardian Kollozi kandidon si djalë i Vlorës, pasi la mandatin e deputetit dhe vendosi të vijë të punojë së bashku me qytetarët e Vlorës. “Ky vendim i tij, ishte vendimi i qytetarit të Vlorës, për të cilin ju dhe çdo vlonjate e vlonjat jeni dhe do të mbeteni të parë. Vlora është e para”, tha Berisha.

“Ne vijmë te ju pasi Vlorën e Ismail Qemalit, Vlorën e flamurit, e kemi shndërruar në Vlorën e NATO-s, e kemi bërë qytetin e qytetarëve që lëvizin të lirë në mbarë Europën. Ne vijmë tek ju për të paraqitur kandidat për kryetar bashkie birin tuaj të shquar, pasi Vlorën e bukurive mahnitëse natyrore e kemi bërë të njohur në mbarë botën”, u shpreh kryeministri Berisha, duke shtuar se “prezantojmë Ardian Kollozin për kryetar të bashkisë së Vlorës, pasi duam të përgatisim Vlorën e 100 vjetorit të pavarësisë, Vlorën e flamurit kryeqytet të shqiptarëve”.

Kryeministri Berisha u shpreh se qeveria do të mbështesë më përparësi të madhe çdo projekt të kryetarit të ardhshëm të ri të bashkisë së Vlorës.

“Kjo është alternativa jonë. Rruga jonë jeni ju, janë interesat tuaja, janë ëndrrat tuaja, projektet tuaja, hallet dhe dertet tuaja, të fëmijëve tuaj, për familjet tuaja, komuniteteve tuaja, është Vlora dhe mbarë Shqipëria”, u shpreh Berisha, ndërsa shtoi se përballë saj është alternativa tjetër, e cila thotë se është rruga e vetme. “Le t’i themi zotit Rama se rruga jote e vetme është rruga e karriges tënde, rruga pa kthim, rruga e asgjëkundit. Rruga jote është rruga e bllokimit, ndërsa rruga jonë është ajo e zhvillimit”, u shpreh Berisha.

Në përgjigje të fjalës së Edi Ramës gjatë çeljes së fushatës elektorale të enjten në Tiranë, Berisha tha se “tipar themelor dallues midisi njeriut të qytetëruar dhe tjetrit është përgjegjësia qytetare”.

“Unë nuk do të merrem me ty në këtë fushatë, jo sepse nuk ia dal dot, por se e vërteta se ti je i vetmi politikan në Shqipëri që s’ke fituar asnjë beteje politike. Atë në krye të Partisë Socialiste e solli Fatos Nano, e solli Sali Berisha”, vijoi më tej kryeministri Berisha.

Ndërsa kandidati i PD-së për bashkinë e Vlorës shpalosi programin e tij për qytetin, duke shprehur angazhim për një jetë më cilësore të qytetarëve, më shumë argëtime për të rinjtë, përmirësimin e transportit publik, etj.