Lumturohet Papa Gjon Pali II

Udhëheqësi i Kishës Katolike, Papa Benedikti XVI, e ka deklaruar të dielën liderin e ndjerë katolik, Papa Gjon Pali II, si “të bekuar”, duke hapur rrugën për shenjtërim para një turme prej një milion vetave.
Rreth 90 delegacione nga e tërë bota, si dhe pjesëtarë të pesë familjeve mbretërore dhe 16 udhëheqës shtetesh kanë marrë pjesë në meshën e lumturimit. Në mesin e këtyre delegacioneve janë edhe kryeministri i Kosovës, Hashim Thaçi, dhe presidenti i Shqipërisë, Bamir Topi.

Sheshi i Shën Pjetrit në Vatikan ishte i stërmbushur me njerëz që mezi prisnin të shprehnin dashurinë e tyre për papën e ndjerë, liderin e parë katolik që nuk ishte italian në 400 vjetët e fundit dhe i pari nga Evropa Lindore.

Një nga pelegrinët italian, Frederiko Martinelli, ka shprehur gëzimin e tij për turmën e madhe të njerëzve që ishin mbledhur në Vatikan për lumturimin e Papa Gjon Palit II.

“Padyshim që është një festë e madhe, një festë e madhe për të gjithë. Kjo gjithashtu është një fitore, sinqerisht e them një fitore ndaj kundërshtarëve dhe një konfirmim për papatin e Papa Gjon Palit II”, ka thënë Martinelli.

Papa Gjon Pali II ishte nga Polonia, ndërsa vdiq në vitin 2005, duke qenë në krye të Kishës Katolike për 26 vjet. Gjatë kësaj kohe ai vizitoi qindra shtete, në shumë prej të cilave ishte jashtëzakonisht popullor. Ai njihet për qëndrimin e tij të ashpër kundër tolitarizmit, me theks të veçantë komunizmit dhe shtytjen para të dialogut në mes të feve të ndryshme.