Vritet Osama bin Laden

nga **Zyma** Mon May 02, 2011 9:03 am

Osama bin Laden, udhëheqësi i rrjetit terrorist të Al Qaedas është vrarë në një operacion të forcave amerikane në Pakistan.

Lajmi u bë i ditur nga presidenti amerikan, Barack Obama. Truri i
sulmeve të 11 shtatorit 2001 në Shtetet e Bashkuara u vra brenda
territorit të Pakistanit dhe SHBA-të kanë trupin e tij, transmeton
lajmin Radio Evropa e Lirë.

“Vdekja e bin Ladenit shënon një nga arritjet më të rëndësishme të
vendit tonë në luftën kundër Al Qaedas. Por vdekja e tij nuk shënon
fundin e përpjekjeve tona. Nuk ka dyshime se Al Qaeda do të vazhdojë të
përpiqet të na sulmojë. Ne duhet dhe do të jemi vigjilent si brenda dhe
jashtë", tha presidenti Obama.

Presidenti amerikan tha se forcat amerikane që morën pjesë në operacionin e vrasjes së bin Ladenit nuk pësuan asnjë humbje.

Raportet e para flasin për një sulm të forcave të SHBA-ve drejtuar
ndaj një vile jashtë Islamabadit dhe pati luftime në vendin e ngjarjes.

Mijëra njerëz janë mbledhur përpara Shtëpisë së Bardhë dhe në vendin
ku dikur ishin kullat binjake në Nju Jork duke valëvitur flamuj
amerikanë. Rreth 3000 njerëz u vranë nga sulmet terroriste në SHBA më 11
Shtator 2001.

Ndërkaq, pas lajmit për vrasjen e terroristit bin Lade, kanë ardhur
edhe reagimet e para të burrështetasve botëror. Të parët që e morën vesh
lajmin ishin ish-presidentët amerikanë, Bush dhe Clinton. Presidenti
Bush përmes një deklarate tha se kjo ishte "fitore e madhe për
Amerikën".

Kryeministri britanik, David Cameroon ka qenë ndër të parët që ka
reaguar pas vrasjes së bin Ladenit. Ai tha se vdekja e bin Ladenit ka
sjellë "lehtësim të madh" në të gjithë botën.

Kryebashkiaku i Nju Jorkut, Michael Bloomberg tha se shpreson që lajmi të ndihmojë të afërmit e viktimave të 11 shtatorit.

Kryeministri izraelit ka vlerësuar lart Shtetet e Bashkuara për operacionin që çoi në vrasjen e Osama bin Ladenit.

"Ky është triumf për drejtësinë, lirinë dhe vlerat që ndajnë vendet
demokratike që kanë luftuar bri njëra-tjetrës me vendosmëri kundër
terrorizmit", tha Netanjahu.

Ministri i jashtëm i Gjermanisë mirëpriti vrasjen e bin Ladenit, të
cilin e cilësoi si një nga terroristët më brutalë. "Ai ka jetët e mijëra
të pafajshmëve në ndërgjegje", tha Westervele.