Rritet popullariteti i presidentit Obama

Vrasja e kryeterroristit Osama Bin Laden ka ndikuar në rritjen e popullaritetit të presidentit të Shteteve të Bashkuara, Barack Obama, duke përmirësuar kështu pikëpamjet e amerikanëve për lidershipin e tij dhe përpjekjet e tij për ta luftuar terrorizmin.
Këto rezultate janë nxjerrë të mërkurën nga një sondazh i bërë nga agjencia e lajmeve Reuters.

Rreth 4 nga 10 amerikanë thonë se opinioni i tyre për presidentin Obama është përmirësuar, pasi ai të hënën kishte urdhëruar operacionin e suksesshëm ushtarak në Pakistan për të vrarë bin Ladenin.

Mirëpo rritja e popullaritetit të Obamas nga vdekja e bin Ladenit mund të mos zgjasë shumë, pasi votuesit sërish do të fokusohen në ekonomi dhe në uljen e papunësisë, që janë shqetësimet kryesore në fushatën për zgjedhjet presidenciale të vitit 2012 në SHBA.