Sicili, operacion anti-mafia, nëntë të arrestuar

Policia italiane e qytetit të Palermos po zbaton nëntë urdhër-arreste ndaj personave të akuzuar për përfshirje në organizata mafioze. Lajmin e bëjnë të ditur mediat italiane, sipas të cilave të arrestuarit janë anëtarë të familjes mafioze të zonës së Kakamos, e cilësuar nga hetuesit si “Zvicra” e Cosa Nostra-s.
Gjatë hetimeve dyvjeçare agjentët kanë identifikuar një seri sulmesh ndaj bizneseve të kryera gjatë periudhës 2004-2007, në zonën Termini Imereze, raporton TCH. Këtu, familja mafioze po përpiqej të rivendoste ekuilibra të rinj, të cenuar pas pendimit të bosit Antonino Giuffre, ish-krahu i djathtë i Bernardo Provenzano.

Ndërkohë, në një operacion tjetër, policia ka sekuestruar objekte me vlerë 13 milionë euro, pronë e një biznesmeni të Palermos, i lidhur me mafien.