KB ndan listën e sanksioneve kundër talibanëve dhe Al Qaedes

Kombet e Bashkuara do të bëjnë në të ardhmen dallime të mëdha midis talibanëve radikalë islamikë dhe rrjetit terrorist të Al Qaeda.
Këshilli i Sigurimit të Kombeve të Bashkuara në New York, vendosi përpilimin e dy listave të ndara, njofton Deutsche Welle. Deri tani ithtarë të talibanëve dhe luftëtarë të Al Qaedes janë përfshirë në të njëjtën listë.

Në bazë të kësaj liste bëhet bllokimi i pasurive dhe ndalimi i lëvizjes së lirë. Rregulli i ri duhet të nxjerrë në pah më shumë strukturat e ndryshme dhe objektivat e dy grupeve.

Iniciativa e marrë nga SHBA është pjesë e përpjekjeve të perëndimit, për të gjetur një zgjidhje për misionin ushtarak dhjetëvjeçar në Afganistan. Edhe qeveria e Kabulit përpiqet të arrijë pajtimin me talibanët, të cilët nën kushte të caktuara duhet të integrohen në shoqëri.