Mesiq krahason Dodikun me Miloshevicin

Ish presidenti i Kroacisë, Stipe Mesic thotë se Evropa duhet që të “hedhë” jashtë jetës politike presidentin e Republikës Serbe të Bosnjës, Milorad Dodik, sepse ai bën “gjithçka për të shkatërruar” Bosnje e Hercegovinën.
Mesic në një intervistë për gazetën vjeneze “Standard” e ka krahasuar Dodikun me Slobodan Miloshevicin.

Ai ka konstatuar se çelësi për zgjidhjen e problemeve në Bosnje, megjithatë gjendet më shumë në Beograd e më pak në Banjallukë.

“Dodik dikur e ka kundërshtuar Slobodan Miloshevic. Megjithatë, sot udhëheq politikë të njëjtë, sikurse Miloshevic, por me mjete tjera, pa tankse dhe gjenocid, por me mjete politike”, ka thënë Mesic.

Sipas tij, komuniteti ndërkombëtar duhet të forcojë pozicionin e përfaqësuesit të lartë, i cili duhet ta ketë mundësinë që t’i “largojë” nga jeta politike, ata që duan ta shkatërrojnë Bosnjën.