Clinton: Gaddafi t’i hapë rrugën demokracisë

Sekretarja amerikane e Shtetit, Hillary Clinton, nuk u ka kushtuar rëndësi kërcënimeve të udhëheqësit libian Muammar Gaddafi se do të sulmonte civilët në Evropë, nëse NATO nuk ndalte goditjet ajrore ndaj Tripolit.
Udhëheqësi libian u tha përkrahësve në një tubim në Tripoli se “shtëpitë, zyrat dhe familjet” në Evropë do të bëhen objektiva të përligjshme për ushtrinë e tij, nëse sulmet e NATO-s vazhdojnë.

"Në vend që të bëjë kërcënime, Gaddafi duhet të vërë mirëqenien dhe interesat e popullit të tij para të vetave dhe të largohet nga pushteti që të mundësojë një tranzicion demokratik që përmbush aspiratat e popullit libian”, citon Zëri i Amerikës sekretaren Clinton.

Mesazhi sfidues i Gadafit pason nxjerrjen para pak ditësh të urdhërarresteve për të dhe një ndër djemtë e tij nga Gjykata Ndërkombëtare Penale. Në këto urdhërarreste Gaddafi akuzohet se ka orkestruar vrasjen e civilëve gjatë protestave anti-qevritare në Libi.