Turqia njohu Këshillin kalimtar të kryengritësve libianë

Këshilli kalimtar i kryengritësve libian është përfaqësues legjitim i popullit të Libisë, ka deklaruar në Bengazi, në selinë e Këshillit të kryengritësve, shefi i diplomacisë turke, Ahmet Davutoglu.
Ai ka thënë se Turqia do të bëjë gjithçka është e mundur për t’i kontribuar përfundimit të konflikteve ndërmjet forcave të presidentit Muammer Gaddafi dhe atyre kryengritëse.

I pyetur nga gazetarët se a do t’i jepte Turqia strehim Gaddafit, nëse arrihet ndonjë marrëveshje paqësore, Davutoglu tha se “nëse do të arrihet marrëveshja, ne do të bëjmë gjithçka që kemi mundësi”, njofton AFP.

Me njohjen e Këshillit kalimtar të kryengritësve libianë, Turqia iu bashkua njohjeve të Këshillit të kryengritësve që më parë i shpallën Franca, SHBA-ja, Katari, Malta, Britania e Madhe, Italia, Jordania, Spanja, Bullgaria, Kroacia dhe disa vende të tjera.

Për shkak të mungesës së mjeteve për rindërtimin e infrastrukturës dhe qyteteve të bombarduara nga forcat e Gaddafit, Turqia i ka dhënë Këshillit kryengritës kredi prej 100 milionë dollarësh, e po kaq edhe për projektet e rindërtimit dhe ndërtimit.