Yllka Kuçi: Kurrë s’kam dhënë para në festivale

Këngëtarja e njohur kosovare e cila pothuajse në çdo festival që ka marrë pjesë është shpërblyer me çmime, ka thënë se ajo asnjëherë në jetën e saj nuk ka paguar për ndonjë çmim që e ka fituar.
“Kurrë në jetën time nuk kam dhënë para në festivale, përpos që e kam paguar kompozitorin i cili e ka punuar këngën”, ka thënë këngëtarja gjakovare në emisionin “Fehi’s show” që u transmetua mbrëmë në televizionin 21.

Duke folur për organizimin e festivaleve shqiptare dhe çmimet që blihen nga këngëtarët, Kuçi theksoi se këngëtarët mund të fitojnë çfarëdo çmimi, por çmimi më i madh për një këngëtarë është ai që fiton zemrat e publikut.

Këngëtarja e cila vlerësohet për zërin e saj, përpos që këndoi dy këngë live, bëri më dije se hitin e saj “Dhe te dua ty” e ka dhuratë nga i fejuari i saj, kompozitori Astrit Pallaska, këngë kjo me tekst të shkruar nga Jorgo Papingji.

Gjatë këtij emisioni ajo foli edhe për profesionin e saj dhe punën që e bën si psikologe, ndërkaq premtoi se gjatë këtij viti do të editoj një album me këngët e saja të deritashme si dhe një album tjetër me këngë të vjetra qytetare.

Në “Fehi’s show” këndoi edhe një djalosh i ri i ardhur nga diaspora, ndërsa muzika u shoqërua gjatë tërë emisionit nga “Zanzi Band”.

E ndërkohë, as në këtë emision nuk shpëtuan pa u komentuar nën llupen e prezantuesit Fehmi Feratit ngjarjet më interesante të javës si: konkluzionet e negociatave me Serbinë, tabelat e regjistrimit, temperaturat e larta në Kosovë, pushimet, ardhjen e mërgimtareve si dhe po ashtu komentet e titujve më interesant të shtypit tonë ditorë.

Ritransmetimi i emisionit “Fehi’s show” transmetohet çdo të martë në orën 13.00 në televizionin 21.