Fotografia, pasioni i Eliza Hoxhës

- Eliza Hoxha që nga i gjithë publiku shqiptar njihet si këngëtare, është edhe një fotografe shumë e zonja. Këto ditë ajo është zgjedhur kryetare e Këshillit të Galerisë së Arteve në Kosovë.
E kontaktuar nga ne. Eliza na shpjegoi me detaje rrugën e saj me fotografinë, që ndoshta mund t’ju duket e çuditshme, por është një periudhë goxha e gjatë e jetës së saj që Eliza është marrë me fotografinë. E pyetur si e ka nisur rrugën e fotografisë, këngëtarja e njohur u përgjigj: “ Për ata që me njohin më shumë nuk është një risi. Kam punuar në gazetën ‘Zëri’ nga 1993 deri ne 1999 si fotoreportere… po ashtu edhe në zyrën e fondacionit “Soros” në Kosovë midis 1998-2000…gjithashtu kam qenë nga 2000- 2002 koordinatore e projekteve për të rinjtë në Galerinë Kombëtare të Kosovës”. Më pas ajo vazhdoi, “Fotografia sot për mua është vetëm pasion dhe nuk e ushtroj rregullisht e as në ndonjë institucion…pavarësisht se kam qenë pjesë e shumë ekspozitave kolektive të fotografisë në Galerinë e Arteve të Kosovës, si ” Gjon Mili” “Salloni i nëntorit” dhe të tjera…po ashtu kam pasur një ekspozite personale në po të njëjtin institucion në vitin 2007. Bëhet fjalë për projektin multimedial “Për ata që s’janë” dedikuar personave të pagjetur nga lufta e fundit në Kosovë”. Duke parë gjithë këtë rrugë artistike të Eliza Hoxhës kuptojmë se ajo, jo rastësisht qenka përzgjedhur si kryetare e Këshillit të Galerisë së Arteve në Kosovë, atëherë nuk na mbetet gjë tjetër vetëm t’i urojmë shumë suksese, transmeton “Koha Jonë”.