Nuk ka rrezik nga ekstremistët e djathtë?

Kryeministri i Norvegjisë, Jens Stoltenberg, ka deklaruar se në vendin e tij nuk ka probleme me ekstremistët e djathtë, ndërsa ka shtuar se shumë shpejtë do të arrihen përfundime mbi motivin e sulmit.
“Në krahasim me vendet e tjera unë nuk mund të them se kemi problem me ekstremistët e krahut të djathtë në Norvegji. Por kemi disa grupe, të cilët i kemi ndjekur edhe më parë, dhe policia jonë ka dijeni për grupe të tilla Norvegji”, ka thënë ai.

Kryeministri Stoltenberg ka thënë më tej se vendi është i bashkuar në këtë tragjedi.

"Norvegjia është vend i vogël, por jemi krenar, dhe jemi të afërt me njëri-tjetrin sidomos në ngjarje të tilla. Mendoj se të gjithë norvegjezët ndjehen shumë pranë viktimave të dhunës në Oslo dhe të rinjve në kampin e ishullit", ka shtuar ai.

Ndërkohë, Ministri i Brendshëm gjerman, Hans-Peter Friedrich, ka thënë po ashtu se nuk ka rrezik për sulme terroriste të menjëhershme të ekstremistëve të djathtë.

“Dëshmi për aktivitete terroriste të krahut të djathtë aktualisht nuk ka. Por veprimet e urryera në Norvegji dëshmojnë përsëri se rreziqe të tilla nga individë fanatikë mund të dalin”, është shprehur Friedrich.