Noizy qellohet me shishe, nderhyn policia

Lufta e fansave mes grupeve muzikore “rep” në Shqipëri duket se
po kthehet në shqetësim për policinë, ku veç plagosjeve me armë, tashmë
agresiviteti po kthehet edhe në skena publike. I njohuri i muzikës
‘rep’, Noizy është qëlluar me bidonë në skenë, duke detyruar policinë që
ta fusë në makinë e ta largojë nga turma. Kështu, Noizy u bë
edhe një herë protagonist i radhës i incidenteve të vazhdueshme ku
përfshihet, sidomos në konfliktet që ka me “Stressin”. Repisti ka qenë
dy net më parë duke kënduar në koncertin e organizuar nga Bashkia e
Tiranës në sheshin “Nënë Tereza” me rastin e festës së Pavarësisë, kur
është qëlluar me bidonë uji në skenë. Më herët, ai kishte pozuar edhe me
kryebashkiakun e Tiranës, Lulzim Basha e më tej nisi të interpretojë në
skenë. Në atë kohë, një grup personash të rinj, që mendohet se janë
mbështetës të këngëtarit tjetër “Stressi”, kanë nxjerrë disa bidonë uji,
duke e goditur. Noizy është përpjekur t’u shmanget duke improvizuar
lëvizje kërcimi dhe fillimisht nuk është prekur nga bidonët që hidheshin
nga turma. Më pas situata është rënduar, kështu që ka ndërhyrë policia,
duke mos lejuar që ai të lëndohet. Burime nga policia thanë se tetë
bidonë u hodhën në drejtim të repistit, por shtuan se asnjëra prej tyre
nuk e kapi atë. Por, uniformat blu kanë ndërhyrë në turmë, duke
shoqëruar disa të dyshuar dhe duke ndaluar të tjerët të kryejnë gjeste
të dhunshme. Pas përfundimit të këngëve, këngëtari u largua me makinë
policie. “Për të shmangur vrullin e fansave të cilët vrapuan drejt
këngëtarit, policia e shoqëroi atë me makinë disa metra larg grumbullit
të njerëzve”, – thanë burime nga policia. Me gjithë shoqërimet e kryera,
policia tha se nuk u identifikua asnjë nga personat që qëlloi Noizy-n,
ndërsa ky i fundit nuk kreu denoncim. Kjo nuk është hera e parë e
përplasjeve mes grupeve të “repit” në Shqipëri. Madje, ato kanë sjellë
edhe pasoja të rënda, ku persona të ndryshëm janë armatosur me armë dhe
janë qëlluar. Përplasjet më të forta kanë ndodhur kur këngëtarët
performonin në të njëjtën skenë. Madje, policia shoqëroi para disa
muajsh të dy këngëtarët, Noizy-n dhe “Stressin”, duke i pajtuar, me
qëllim për të parandaluar ndonjë krim të rëndë.