BE-ja mund të rivendosë kërkesat për viza për disa shtete

Bazuar në rregullat e reja, për të cilat u arrit pajtueshmëri
dje në Bruksel, qeveritë e Bashkimit Evropian do të kenë mundësi që
shumë shpejtë të rivendosin kërkesat për viza për udhëtarët nga vendet e
Ballkanit Perëndimor, në rast se ka ndonjë fluks të papritur të
emigrantëve.Vendimi i ministrave të brendshëm të BE-së ka
adresuar shqetësime për një rritje të lartë të azilkërkuesve nga vendet e
Evropës lindore, shumica prej të cilëve i takojnë komuniteti romë,
njofton agjencia e lajmeve Reuters, transmeton Rel.

Shumica e qytetarëve nga Ballkani tani mund të udhëtojnë pa viza në
zonën Shengen. Një gjë e tillë ka bërë që të rritet numri i
azilkërkuesve në disa vende të Evropës perëndimore, veçanërisht në
Gjermani, Belgjikë, Luksemburg dhe Suedi.

Rregullat e reja, njofton Reuters, do ta lehtësonin anulimin e udhëtimit pa viza për shtete të caktuara.

Parlamenti Evropian ende duhet të diskutojë e të votojë për këto masa.

Qeveritë e Bashkimit Evropian mundësuan udhëtimin pa viza për
qytetarët e Shqipërisë dhe Bosnjës në fund të vitit 2010, një vit pasi i
dhanë të njëjtën mundësi Serbisë, Malit të Zi dhe Maqedonisë, me qëllim
të promovimit të stabilitetit në Ballkan.

BE-ja është në proces të marrëveshjes për udhëtim pa viza për
Ukrainën dhe Moldavinë, por është duke vënë kushte për sigurinë e
dokumenteve të udhëtimit dhe menaxhimin e emigrantëve ilegalë.