Vazhdon reformimi institucional

Në Ministrinë e Administratës Publike të premten është mbajtur takimi i parë i Komitetit Drejtues të projektit FRIDOM – ku është diskutuar për objektivat dhe planin e punës për periudhën nëntor 2009-prill 2010, strategjinë e komunikimit të FRIDOM-it dhe reformën e Administratës Publike (RAP), si dhe mbështetjen për RAP-in.

Me këtë rast, ministri i Administratës Publike, Arsim Bajrami ka falënderuar Qeverinë britanike për angazhimin që ka treguar në ekspertizën e funksionalitetit dhe riorganizimit të Qeverisë, përmes ekspertëve, që - sipas tij – “me shumë profesionalizëm po bëjnë rishikimin vertikal dhe horizontal”.

Bajrami ka theksuar faktin se ky projekt ka ardhur në kohën e duhur, pikërisht kur Qeverisë së Kosovës i është dashur ndihma në këtë drejtim, për të arritur tri qëllime kryesore: krijimin e strukturave efikase, efektive dhe vendim marrëse, krijimin e një administrate funksionale dhe racionale, në harmoni me kapacitetet buxhetore, si dhe pretendimin për të arritur praktikat e mira evropiane.

Modelet e shteteve të përafërta me realitetin e Kosovës – sipas tij - kanë shërbyer edhe për të filluar marrëdhënie bashkëpunimi me këto shtete, duke këmbyer përvojat e ndërsjella në këtë aspekt.

Ministri Bajrami ka shprehur mbështetjen e tij për të zbatuar deri në fund këtë projekt, duke kërkuar që përveç vullnetit të mirë, të gjitha instancat të angazhohen në veprime konkrete për riorganizimin ministrive dhe reformimit të tërësishëm institucional.

Shefi i DFID-it, Robert Watt ka shprehur kënaqësinë e tij që është pjesë e këtij Komiteti Drejtues. Duke pasur parasysh rishikimin e tërësishëm, planet zhvillimore strategjike, synimin drejt integrimeve evropiane etj., ai e ka konsideruar Projektin e rishikimit institucional kompleks dhe sfidues, duke premtuar mbështetjen e DFID-it në projekte konkrete.

Ndërkaq, Damian Duffy shkurtazi ka përmendur pikat kyçe të angazhimeve të FRIDOM-it, duke theksuar se do të vazhdojnë të mbështesin MAP-in në procesin e reformimit të administratës publike.

Pjesa tjetër e këtij takimi ka përfshirë pjesën prezantuese nga drejtuesi i Projektit FRIDOM, Ugis Sics, lidhur me Raportin e Progresit të Projektit, objektivat dhe aktivitetet e parashikuara për gjashtë muajt e ardhshëm, si dhe strategjinë e komunikimit për RAP-in. Ky prezantim është pasuar me diskutimet e të pranishmëve, në funksion të temave të trajtuara në këtë takim.

Komiteti Drejtues është formuar me një vendim të veçantë të ministrit të MAP-së, Arsim Bajramit, në përbërje të të cilit do të jetë sekretari i përhershëm i MAP-së, përfaqësuesi i DFID-it, përfaqësues nga Zyra e Kryeministrit, përfaqësues nga Projekti FRIDOM si dhe drejtori i Departamentit për Menaxhimin e Reformës së Administratës Publike dhe Integrimeve Evropiane. /Telegrafi/