Shkodër, vritet në grindje banale 51-vjecari

Një 51-vjecar, banor i fshatit Trush të Shkodrës, është qëlluar për vdekje ditën e sotme, pas një grindjeje për motive banale.

Viktima është përplasur me fjalë me një person tjetër, autorin e krimit, shtetasin Fadil Mehmetaj, per të vendosur se kush duhej të kalonte i pari me makinë në urën e fshatit.

Burime nga policia e Shkodrës bëjnë të ditur se viktima ka qenë duke udhëtuar me automjetin e tij për të hyrë në fshat, ndërsa një tjetër makinë ku ndodheshin tre persona brenda ka qenë duke dalë nga fshati dhe janë përballur në urën njëkalimshme.

Këtu ka nisur edhe sherri mes palëve, ku sipas dëshmitarëve në fillim janë përdorur fyerje e ofendime dhe më pas një nga tre personat që ndodhej në makinë ka qëlluar me armë zjarri shtetasin Sahbah Ramadani, duke i shkaktuar vdekjen.

Pas krimit, mjeti është larguar me shpejtësi dhe është gjetur pak më vonë i braktisur nga policia, e cila ka arrestuar pasdite autorin e krimit, që është dorëzuar kur është gjendur i rrethuar në shtëpinë e tij nga forcat e rendit.