Shkodër: Përgjaket Viti i Ri, vritet një 30 vjeçar

Vetëm dy orë para ndërrimit të viteve, një 30 vjeçar është ekzekutuar
në një pritë për motive gjakmarrjeje në Shkodër, tek dera e shtëpisë së
tij.
Ngjarja ka ndodhur rreth orës 22 në fshatin Shtoj, 6 km larg
Shkodrës. Viktima, Albert Dhampiraj, 30 vjeç është qëlluar nga një
distancë e afërt tek pragu i shtëpisë në momentin që po futej në banesë
për të festuar në familje ndërrimin e viteve.

Sipas policisë, dyshohet që vrasja të ketë motive gjakmarrjeje pasi
familja e viktimës ishte në gjak me një tjetër familje në fshat.

Për shkak të plagëve të shumta që ka marrë, viktima ka vdekur në
vend. Pak orë më pas, gjatë paradites së datës 1 janar, policia ka
arrestuar një 15 vjeçar, Isa Shpuza, si autor të vrasjes së shtetasit
Albert Dhampiraj.

Policia sqaroi se 15 vjeçari ka kryer krimin pasi viktima i kishte
vrarë babanë 5 vite më parë. Ndërkohë, në fshat njihej konflikti i
ashpër mes dy familjeve Dhampiraj e Shpuza, për shkak të
mosmarrëveshjeve për një lidhje martesore pa pëlqimin e familjes Shpuza