Policia nxjerr në shitje veturat

Policia e Kosovës është duke planifikuar të nxjerrë në shitje disa makina të saj, të cilat deri më tani janë përdorur për nevojat e këtij shërbim. E tërë kjo pritet të ndodhë në muajt e ardhshëm, pasi që policia të përfundojë me evidentimin e të gjitha makinave të cilat tashmë nuk ka interes për t’i mbajtur.



Makinat në ankand

Sipas zyrtarëve të PK-së procesi i evidentimit tashmë ka filluar dhe në fund të tij do të dihet se sa vetura do të nxirren në shitje. E tërë kjo veprimtari brenda policisë është konfirmuar edhe nga zëdhënësi i PK-së, Baki Kelani, i cili i ka thënë gazetës se për momentin PK-ja është duke bërë evidentimin e makinave për të cilat më nuk ka nevojë. Sipas Kelanit, janë një varg kriteresh të cilat bëjnë që një makinë e policisë të nxirret në shitje. “Në shitje do të nxirren makinat të cilat nuk kemi më interes t’i riparojmë ato, të cilat kanë kaluar kilometrazh të madhe dhe po ashtu makinat më të vjetra se shtatë vjet”, i ka thënë Kelani gazetës. Sipas tij, në javët në vijim pas përfundimit të procesit të vlerësimit pritet të dihet edhe numri i veturave të cilat do të shiten nga ana e PK-së.

Përndryshe sipas burimeve të gazetës brenda PK-së pjesa më e madhe e makinave të cilat do të nxirren në treg janë të llojit KIA, makina këto për mirëmbajtjen e të cilave Policia e Kosovës ka shpenzuar mjaft mjete. Po ashtu sipas këtij burimi këto makina janë shfrytëzuar në masë të madhe dhe pas amortizimit janë shumë vështirë të përdorshme.

Vitin e kaluar policia në bashkëpunim me institucionet kompetente kishte organizuar një ankand publik ku ishin shitur dhjetëra vetura të përdorura, pjesa më e madhe e të cilave kishin kaluar mbi 300 mijë kilometra.



Pajisja me makina

Policia e Kosovës ka një fletë të veturave të përbërë prej rreth 1000 veturash e ku hyjnë rreth 30 lloje dhe tipe të automjeteve ku hyjnë edhe dy autoblinda, disa autobus dhe kamionë si dhe veturat civile të cilat PK-ja i përdor për operacionet e fshehta.

Në fillim të punës së saj pjesa më e madhe e veturave të PK-së ishin vetura të ardhura nga Azia përkatësisht nga Koreja e Jugut(veturat KIA), mirëpo pas bartjes së përgjegjësive nga UNMIK-u te PK-ja këta të fundit janë interesuar të blejnë vetura të prodhimit evropian. Si rezultat i kësaj Policia e Kosovës është pajisur kryesisht me vetura të tipit WV përkatësisht GOLF5 dhe GOLF6 dhe sipas zyrtarëve të PK-së ky fakt ka ndikuar shumë në kursimin e buxhetit të PK-së, pasi që këto vetura shpenzojnë me pak dhe se mirëmbajtja e tyre kushton më lirë.

Vitin e kaluar PK-ja kishte blerë rreth 60 vetura GOLF VI përderisa në 2010-n PK-ja mori një donacion nga KFOR-i, ku hynin rreth 30 vetura Mercedes.

Për dallim nga institucionet e tjera policia ka një sistem më të mirë të punës për sa i përket servisimit të veturave përkatësisht policia i servison vetë veturat e veta të prishura, duke krijuar kështu mundësi të mira për sa i përket kursimeve për mirëmbajtjen dhe servisimin e veturave. Përndryshe konform ligjit veturat e institucioneve të vendit ku përfshihet edhe PK-ja duhet të jenë të prodhimeve të viteve të fundit, përkatësisht këto vetura nuk duhet të jenë më të vjetra se shtatë vjet. Sipas zyrtarëve të PK-së vjetërsimi i makinave është edhe njëra ndër arsyet që PK-ja vit pas viti nxjerr në treg veturat e saj të vjetra dhe të amortizuara.