Maskat grabisin 10 mijë euro në kazino

Autoritetet policore nga Ferizaj kanë njoftuar se dy persona të maskuar dhe nën kërcënimin e armës në kazinon ‘Merkur’ nga punëtori i kësaj kazinoje kanë grabitur rreth 10.000 euro, të cilat para kanë qenë në arkën metalike. Ngjarja ka ndodhur të premten rreth orës 07:20. “Policia e Stacionit Policor në Ferizaj është informuar se në rrugën ‘2 Qershori’në Ferizaj në kaznon ‘Merkur’ ka ndodhur një rast grabitjeje e armatosur. Me të marrë informatën, njësitet policore i janë përgjigjur rastit dhe kanë ndërmarrë të gjitha veprimet e duhura policore dhe në vendin e ngjarjes janë informuar se të dyshimtit janë larguar në drejtim të panjohur”, njofton zëdhënësi i PK-së për rajonin e Ferizajt togeri Agim Gashi. Në vendngjarje ka dalë edhe Njësiti i Hetimeve Rajonale. Lidhur me rastin është njoftuar prokurori kujdestar i Prokurorisë së Qarkut –Prishtinë, i cili autorizon Hetimet Rajonale që të ndërmarrin të gjitha veprimet lidhur me rastin. Për momentin nuk ka të arrestuar.