Gjuriqit i vazhdohet suspendimi

Komandanti i Policisë së Kosovës në Zveçan, Nenad Gjuriq, i ka dërguar një letër kërcënuese eprorit të tij, drejtorit të përgjithshëm të Policisë së Kosovës, Reshat Maliqi. Burimet në polici i kanë thënë portalit Indeksonline, se ai i ka shkruar Maliqit për t’i thënë se nuk ia njeh autoritetin dhe se nuk e ka ndërmend ta implementojë urdhrin e tij për të konfiskuar targat e Serbisë të lëshuara për Kosovën. “Nuk do të ndërmarrë asnjë hap që dëmton jetën e qytetarëve serbë të Kosovës dhe Metohisë”, është shkruar mes tjerash në letër. Me të marrë letrën, i nervozuar me përmbajtjen, Maliqi menjëherë ka marrë vendim për vazhdimin e suspendimit të tij, me qëllimin përfundimtar largimin e tij nga Policia e Kosovës. Arsyetimi për largimin do të jetë “shkelje e rëndë e urdhrit”. Vazhdimin e suspendimit e ka konfirmuar edhe Policia. “ Atij i është vazhduar suspendimi deri në përfundimin e hetimeve dhe çdo gjë varet nga rekomandimet e njësitit të hetimeve të brendshme”, ka thënë në një prononcim për Indeksonline, zëdhënësi Brahim Sadria. Gjuriq u suspendua më 14 janar për shkak të mospranimit të zbatimit të urdhrit për konfiskimin e targave ilegale të Serbisë në Kosovë.