Rrahim Avdullahut, 30 ditë paraburgimi

I akuzuar si njëri ndër aktorët kryesorë në vrasjen e policit Triumf Riza, i dyshuari Rrahim Avdullahu është deklaruar si i pafajshëm dhe njëherësh i ka mohuar të gjitha veprimet të cilat i vihen në barrë. Këto deklarime, sipas gjyqtarit paraprak të rastit, Avdullahu i ka bërë pak minuta pasi që prokurori Reshat Millaku ka kërkuar nga Gjykata që të caktohet masa e paraburgimit për këtë të dyshuar. Sipas gjyqtarit Vehbi Kashtanjeva gjatë seancës së caktimit të paraburgimit, i dyshuari nuk e ka pranuar veprën penale dhe është deklaruar i pafajshëm. Gjyqtari paraprak Kashtanjeva ka konfirmuar lajmin se pas kërkesë së Prokurorisë, Gjykata e ka caktuar masën e paraburgimit prej 30 ditësh për të pandehurin Avdullahu. Sipas Kashtajevës, kjo masë është caktuar për shkak të dyshimi të bazuar se i pandehuri ka kryer veprën penale të vrasjes së rëndë, nga Neni 147, Paragrafi 1 Nënpargrafi 3 dhe 9 lidhur me Nenin 23 të KPPK-së, vepër kjo e cila sipas gjyqtarit është kryer në bashkëkryerje me Enver Sekiraçën dhe Ilir Avdullahun (të vëllanë e të pandehurit Rrahim Avdullahu). Sipas gjyqtarit paraprak, shkaqet për të cilat është bërë caktimi i paraburgimit është rreziku që nëse i pandehuri gjendet në liri mund të fshihet apo arratiset, me qëllim të shmangies nga përgjegjësia penale, e po ashtu rreziku i kryerjes së një vepre të ngjashme. “Ky rrezik vjen nga fakti se vepra penale, e cila i vihet në barrë këtij personi është e rëndë dhe për të shqiptohet dënimi me më së paku 10 vjet burg, apo burgim afatgjatë” ka thënë gjyqtari Kashtanjeva. Rrahim Avdullahu është arrestuar të hënën nga Policia e Kosovës, ndërsa vëllai i tij, Iliri, i cili, po ashtu kërkohet me fletë-arrestin ndërkombëtar për të njëjtat vepra, ka arritur t’i shmanget arrestimit të policisë. /KS/