Pejë: Arrestohen tre të dyshuar për mito

Të hënën, njësiti për Hetimin e Krimeve Ekonomike dhe korrupsionit në Pejë ka arritur që të arrestojë tre persona të dyshimtë lidhur me veprat penale: shpërdorim i pozitës zyrtare ose autorizimit, marrje e mitos, dhënie e mitos.Të dyshuarit e arrestuar nga hetuesit policorë janë: Bajram Z. i lindur 1955 në me banim në Prishtinë. Burim Z. i lindur 1974 me banim në Prishtinë. Bajram Sh. me vendbanim në Fushë Kosovë. Sipas një komunikate të policisë, arrestimi i tre të dyshuarve kishte rezultuar pas marrjes së informacionit nga burgu i Dubravës në Istog se paneli për lirimin me kusht të dënuarve është duke marrë ryshfet për lirimin e të dënuarve pa plotësimin e kritereve për lirim me kusht. Lidhur me këtë informacion është njoftuar Prokuroria Publike e Qarkut në Prishtinë, nga e cila është dhënë urdhëresa me shkrim për zhvillimin e hetimeve paraprake. I dyshuari Bajram Z. deri në momentin e arrestimit ishte i punësuar në Këshillin e Pavarur Mbikëqyrës për Shërbimin Civil të Kosovës në Prishtinë, njëherit ka qenë i angazhuar si anëtar i panelit për lirimin me kusht të personave të dënuar (burgosur) pranë Ministrisë së Drejtësisë, në periudhën kohore 2006.