Sekuestrohen mbi 7 kg marihuanë, arrestohen dy persona

Operacioni policor i koduar me emrin “Start”, i ndërmarrë të hënën në Prishtinë, çoi në pranga dy persona dhe konfiskimin e mbi 7 kilogramëve marihuanë. G. Pireva dhe A. Karavidaj që të dy nga Prishtina u arrestuan nga oficerët e Departamentit Kundër Krimit të Organizuar. Drejtoria Antidrogë ka kryer operacionin “STARTI“ në regjionin e Prishtinës, gjatë këtij operacioni janë kryer bastisjet në dy shtëpi, pronë të personave të dyshuar. Gjatë zbatimit të kontrollit të shtëpive, hetuesit policorë kanë gjetur dhe sekuestruar si pjesë të provave materiale 7. 630 kg substancë narkotike të llojit marihuanë, të paketuar dhe përgatitur për shitje, 691 copë tableta-substancë narkotike të llojit Ekstazi, një peshore për matje, një pistoletë (7.65 cl) me 4 fishekë, dy laptopë, tri videokamera, një veturë “OPEL Kadet”. Shuma e këtyre substancave narkotike arrin vlerën rreth 10.000 euro.