Shtyhet konfirmimi për rastin “Medicus”

Trupi gjykues i Gjykatës së Qarkut në Prishtinë, në krye me gjyqtarin ndërkombëtar të EULEX-it, Viktor Paradal, ka shtyrë për 5 shkurt vendimin për konfirmimin apo jo të aktakuzës ndaj shtatë të dyshuarve të rastit të klinikës “Medicus”. Vendimi për shtyrjen e konfirmimit të aktakuzës ndaj shtatë të dyshuarve Lutfi Dervishi, djalit të tij Arban Dervishi, Ilir Rrecaj, Sylejman Dulla, Islam Bytyqi, Sokol Hajdini si dhe Driton Jilta, ka dalë të premten nga gjyqtari i rastit Viktor Paradal, për shkak të numrit të madh të të akuzuarve, si dhe për shkak të kompleksit të lëndës. Shtyrjen e konfirmimit të aktakuzës për rastin “Medicus” e kanë konfirmuar zyrtarë të EULEX-it. Zëdhënësi i EULEX-it, Blerim Krasniqi, ka pohuar se gjykatësi i rastit ka thënë si i duhet kohë edhe 15 ditë për konfirmimin apo jo të lëndës.

“Konfirmimi i aktakuzës për rastin “Medicus” është shtyrë për 15 ditë, për shkak se ka shumë të akuzuar, është rasti i madh dhe është kompleks. Kështu që më 5 shkurt është data e fundit për konfirmimin apo jo të aktakuzës”, është shprehur Krasniqi. Në anën tjetër, avokatët mbrojtësit e të akuzuarve të rastit “Medicus” janë shprehur se nuk janë në dijeni për shtyrjen e konfirmimit të aktakuzës. Mbrojtësi i Ilir Rrecajt, avokati Florin Vertopi, ka pohuar se është në pritje të vendimit pasi gjykata ende nuk ia ka dërguar vendimin për shtyrje të konfirmimit të aktakuzës. “Ende e presim vendimin, ende nuk është vendosur. Nuk kam marrë vendim, kështu që nuk mund të jap asnjë deklaratë lidhur me këtë”, ka pohuar Vertopi.