Nje i vrare dhe tre te plagosur ne Prizren

Burim Shabani, 22 vjeçar, është vrarë, ndërsa tre perona të tjerë, në mesin e të cilëve edhe babi i viktimës janë plagosur, gjatë një konflikti me armë, që ndodhi në orët e paradites, në zyret e një qendre tregtare, në katin e dytë të një ndërtese që ndodhet në kompleksin e tregut të gjelbër në Prizrenit, konfirmoi të mërkurën policia rajonale në këtë qytet.
Një incident i rëndë me armë ndodhi të mërkurën në Prizren, pikërisht në zyrat e një godine, që ndodhet brenda kompleksit në tregun e gjelbër, në lagjen “Ortakoll” me ç’rast një i ri 22 vjeçar humbi jetën, ndërsa nga të shtënat u plagos babai i viktimës dhe dy persona të tjerë, raporton KosovaLive.
Zëdhënësi rajonal i policisë në Prizren, Hazir Berisha, duke konfirmuar rastin, tha se ngjarja ka ndodhur diç pas orës 11 të paradites, brenda mjediseve të një zyreje në katin e dytë të një qendre tregtare, ndërsa përkundër që është herët të flitet për motivet e rastit, dyshohet se sherri ka plasur si pasojë e një borxhi apo fajde të pazgjidhur mes të përfshirëve në konflikt.
Ai konfirmoi se tre të plagosurit, në mesin e të cilëve dhe babai i viktimës Xh. Shabani, 56 vjeçar si dhe I. A. që të dy nga fshati Tërrnje dhe N. K. nga Suhareka janë dërguar në spital për trajtim dhe sipas mjekëve gjendja e tyre është jashtë rrezikut për jetë.
“Hetues policorë, krimteknika, kryeprokurori, një prokuror lokal, drejtori rajonal i policisë dhe ekipet mjeko-ligjore kanë dalë në vendin e ngjarjes, me ç’rast janë sekuestruar dy armë të lojit pistoletë, për të cilat dyshohet se janë përdorur në rast”, tha togeri Berisha.
Burime në vendin e ngjarjes ndërkaq konfirmuan se viktima është një djalosh 22 vjeçar, Burim Shabani.
Ndryshe ky është rasti i parë i vrasjes në komunën e Prizrenit, gjatë këtij viti.
Sipas drejtorit të policisë rajonale në Prizren, major Nexhmi Krasniqit, gjatë vitit 2010, krimet e rënda patën shënuar rënie në nivel rajoni, ndërsa ishin shënuar vetëm 5 raste dhe që të gjitha janë të zbardhur, meqenëse sipas policisë, autorët e tyre janë përballur me organet e drejtësisë