“Times”: Pranvera arabe e barabartë me rënien e komunizmit

Londër, 20 shkurt – Ngjarjet në botën arabe janë tema qenësore në faqet e politikës së jashtme të gazetave londineze, ndërkohë që këto gazeta faqet kryesore ua kushtojnë ngjarjeve në Bahrejn dhe në Libi, ku nuk kanë të ndaluar protestat anti-regjimit. Shtypi londinez preokupohet shumë edhe me protestat në shtetet e tjera të rajonit. “Times” shkruan se “pranvera arabe”, një zgjim i madh i 2011-ës, është i barabartë me rënien e komunizmit më 1989, dhe po zgjerohet në Afrikën Veriore dhe në Lindjen e Afërt si valët pas shpërthimit të ndonjë pende.
Vetëm para dy muajsh ngjante që 350 milionë banorë të kësaj pjese të botës asnjëherë nuk do të ngrejë kokën nga presioni i regjimit që shuante çdo tentim për zgjim dhe për të kundërshtuar. Por, pas revolucionit në Tunizi dhe Egjipt “revolta e të premtes” e pardjeshme ishte një pamje e paimagjinueshme, raporton BBC.
Që nga Bahrejni, Libia dhe Jemeni deri te Xhibuti dhe Jordania, dhe në fund te Irani që nuk është shtet arab, popullsia e re trimërisht është ngritur kundër diktatorëve, të cilët kanë reaguar ashtu siç dinë ata, me gaz lotsjellës dhe me plumba të vërtetë dhe të gomës, shkruan “Times”.
Edhe pse vendet perëndimore frikohen se do të humbin liderët arabë, të cilët për një kohë të gjatë i kanë përkrahur si digë kundër fundamentalizmit islamik, këto revolucione nuk kanë lidhje me çështjen fetare, as madje me solidarizimin me palestinezët, shkruan gazeta. Në të gjitha këto vende të rinjtë e revoltuar kanë demonstruar kundër represionit, varfërisë dhe elitës së dinastive të korruptuara.
Në Bahrejn, Libi dhe Jemen për dallim nga Tunizia dhe Egjipti, regjimet po tregohen të pamëshirshme dhe akoma po u bëjnë ballë protestave të pandërprera, përfundon teksti i botuar në ballin të “Times”.