Speciale: Verë e nxehtë për repin kosovar!

Vera e vitit 2011 pritet të jetë e jashtëzakonshme, pasi nxehtësia në skenën muzikore kosovare do të jetë për infarkt. Kur flasim në këtë aspekt, menjëherë na vërtitet në mendje repi dhe influenca që ka në industrinë muzikore.
Sigurisht se vera përbën moment shumë të mirë për reperët që t’i lansojnë krijimet e tyre dhe secili me strategjinë e tij do të tentojë që ta rrëzojë rivalin nga ‘loja’. Telegrafi ju sjell gjithë atë që mund të prisni prej reperëve gjatë verës, duke iu thënë – bëhuni gati për një verë shumë, shumë të nxehtë.

Tingulli 3nt -

Jo më kot këtë speciale e nisim me një prej grupeve më të vjetra në Kosovë. Pas lansimit të albumit të parë pas tri vitesh “Ma i Madhi N’Ven”, tani reperët Big Xik dhe Ghetto Gold do të kërkojnë që ta korrin grurin e mbjellur. Nuk mund të pritet ndonjë projekt i jashtëzakonshëm i tyre, pasi së fundmi u lansua albumi, por strategjia e reperëve të “Baba Records” është që me anë të klipeve dhe bashkëpunimeve të mbesin ‘on top’.



Noizy – Reperi nga Shqipëria është heshur pas suksesit bombastik të përjetuar në vitin 2009, por ka paralajmëruar rikthim të fuqishëm gjatë kësaj vere. Nga reperi i ‘labelit’ OTR priten dy deri në tri hite të shoqëruara me klipe.



Unikkatil – I ashtuquajturi ‘Mbret’ i repit shqiptar nuk ka lansuar ndonjë projekt që pas super albumit të vitit 2007 “Kanuni i Katilit”. Spekulimet mbi lansimin e albumit të ri të tij nuk kanë të ndalur, por sipas të gjitha gjasave albumi i ri i një prej
reperëve më të mëdhenj shqiptarë do të vijë në fund të kësaj vere, eventualisht në fillim të vitit të ardhshëm.




Mc Kresha dhe Lyrical Son – “Për Inati T’njoni T’jetrit Recordz” do të titullohet albumi i ri me 22 këngë i reperëve Mc Kresha dhe Lyrical Son, të cilët e paralajmëruan lansimin në mënyrë të veçantë – me anë të një video promovuese e cila nuk ishte parë ndonjëherë më parë. Këtu pritet të përfshihen edhe disa bashkëpunime, ku janë të përfshirë edhe reperë si Bim Bimma e shumë e shumë të tjerë.



Besniku a.k.a 2po2 – Së fundmi edhe një prej reperëve më të respektuar në elitë, Besniku a.k.a 2po2 ka paralajmëruar lansimin e albumit të ri në qershor të titulluar “Authentic”. Do të ishte gabim nëse mendojmë se nuk mund të presim ndonjë superhit nga daja i Capital T, pasi ky album u punua në një studio të Francës dhe serioziteti në realizimin e gjithë albumit bën që pritjet të jenë të mëdha.


Skillz – Edhe grupi Skillz me në krye Ledri Vulën nuk kanë lansuar që një kohë të gjatë album. Pas suksesit me dy albumet paraprake, vet antarët e grupit si Ledri ashtu dhe Visari kishin konfirmuar projekte të reja gjatë verës. Ishte Ledri ai që në një intervistë për Telegrafin pranoi se gjatë verës do të lansohet albumi i ri, i cili do të përmbajë shumë bashkëpunime, ndër ta edhe një super bashkëpunim me kolegët e labelit, Tingulli 3nt.


Barooti – Reperi i ‘labelit’ TBA ka paralajmëruar së fundmi me anë të një video traileri se do të lansojë albumin e ri “RapFather”. Rikthimi i Barootit në skenën e repit kosovar duhet të përcillet me mjaft vëmendje, marrë parasysh impaktin që mund të ketë tek adhuruesit.

Noga Beatbox – Tinejxheri nga Prishtina i cili pos adhuruesve të shumtë, ka edhe një grumbuj armiqsh, pas suksesit të jashtëzakonshëm në ‘beatbox’ ka paralajmëruar fillimin e karrieres si reper. Dhe…këtë ai pritet ta bëjë me bashkëpunime, të cilat pritet t’i realizojë me disa prej artistëve të lartpërmendur.

D.U.D.A – Pas rikthimit në skenë me këngën “Rrugës Tem”, reperi i labelit Double G Army sigurisht se nuk do të mbetet duarkryq për sezonin e nxehtë veror dhe nuk do të ishte befasi nëse shohim ndonjë hit të lansuar nga reperi gjilanas.

Të tjerët – Pos të lartpërmendurve, prapa nuk do të mbesin as artistë të tjerë. Bim Bimma është një prej tyre – ish reperi i NR pas lansimit të projekteve të tij hite si “Raw” dhe “Zani i Skamjes” pritet që të jetë i pranishëm në skenë me anë të miqve të tij Lyrical Son dhe Mc Kresha, ashtu si dhe me anë të bashkëpunimeve tjera. Nuk pritet album, pasi ai së fundmi e bëri këtë. Capital T sipas të gjitha gjasave po punon në heshtje për albumin e tij të ri të konfirmuar kohë më parë në një intervistë për Telegrafin. Vëmendje të veçantë për ‘Capon’…i cili ka ditur të prekë në zemër fansat e tij.




Sigurisht, janë edhe shumë e shumë reperë të tjerë të cilët pritet të lansojnë projektet e tyre, por kjo ishte një listë orientuese për fansat e Hip-Hopit edhe pse ndoshta e kemi lënë dikë pa përmendur.

Është radha juaj tani vizitorë dhe fansa të nderuar që të shpreheni në hapësirën për komente mbi artistët e lartpërmendur dhe mbi ndonjë të cilin nuk e kemi përfshirë në listë. Kush sipas jush do të jetë ‘mbreti’ i kësaj vere në skenën e repit kosovar?