Tuna e zhgënjyer nga Busta Rhymes

Altuna Sejdiu – Tuna, e cila performoi në koncertin e shumëpritur të reperit të famshëm Busta Rhymes në Prishtinë, është shprehur e pakënaqur me sjelljen që ai ka bërë, ndërsa ka zbritur në aeroportin e Kosovës.
Nuk mjaftoi që shtyu dy herë brenda një kohe të shkurtër datat e koncerteve, por hitbërësi i “Break ya neck”, nuk ka përshëndetur askënd nga personat e pranishëm që e prisnin (mes së cilëve shumë media dhe fansa), sapo zbriti nga avioni rreth orës 15:00 të ditës së martë.

Ai zbriti shkallët e avionit, duke folur në celular dhe me të hipur në autobusin që kishte ardhur enkas për ta marrë, vuri kufjet në vesh dhe nisi të dëgjonte muzikë, pa e vrarë mendjen fare për fansat e tij, që një natë më parë e kishin pritur me orë në koncertin, që nuk u realizua, për shkak se Busta kishte “ngecur” në aeroportin e Romës.

“Edhe pse jam shumë e zhgënjyer nga sjellja joprofesionale e një ylli të madh siç është Busta Rhymes, sonte unë do të ndez skenën e këtij koncerti për fansat e muzikës sime”, kishte premtuar Tuna në profilin e saj para koncertit.

Tuna ishte në mesin e këngëtarëve shqiptar që nxehën atmosferën në sallën “1 Tetori” në Prishtinë, para se të performonte reperi i famshëm.