William dhe Kate tashmë burrë e grua

Princi William dhe e dashura e tij nga universiteti, Kate Middleton, tashmë janë burrë e grua.
Dyshja i kanë thënë “PO” njëri-tjetrit në një ceremoni formale por emocionuese në Westminster Abbey.

Në mesin e 1,900 mysafirëve, ku ishin edhe yje si Sir Elton John, David dhe Victoria Beckham, dyshja kanë shkëmbyer zotimet se do ta duan, do ta respektojnë dhe do të jenë në krah të njëri-tjetrit përgjithmonë.

Ata raportohet se janë përcjellë nga dy milionë shikues përmes ekraneve televizive.

Mbreti i ardhshëm, i cili i tha nuses se "dukej e bukur" derisa ajo arrinte te ai duke ecur para altarit, ka thënë “Po” me një zë të qartë dhe të fuqishëm. Kate ka folur më butë dhe është dukur më nervoze dhe e emocionuar.

Kryeministri britanik David Cameron, i cili ishte po ashtu i pranishëm në ceremoni së bashku me bashkëshorten e tij Samantha, ka thënë se Martesa Mbretërore tregon “më së miri Britaninë”.

“Si çdokush që jeton në Britani, ndjeni një lidhje të fuqishme me këtë ngjarje dhe kjo është arsyeja se pse mendoj se i gjithë vendi duhet të jetë i ngazëllyer për këtë”, ka thënë Cameron për Sky News.