Aurela Gaçe sot në gjysmëfinalen e Eurovizionit

Aurela Gaçe do të ngjitet sot në skenën e Dyseldorfit për të përfaqësuar Shqipërinë dhe miliona shqiptaret kudo ne bote. Këngëtarja shqiptare do të jetë në konkurrim me 18 këngëtarë të tjerë të natës së parë gjysmëfinale të Eurovizionit. Ajo do të ngjitet e treta në konkurim. Kjo do të jetë nata vendimtare, për të kuptuar nëse Aurela Gaçe dhe Shqipëria do të mund të kualifikohen për të konkurruar në natën finale të 14 majit.

Gjithçka do të bazohet në votat e shteteve që konkurojnë, që prej disa vitesh, ky sistem është kritikuar për ngjyrimet politike që merr. Ndërkohë, provat kanë përfunduar. Aurela Gaçe prezantohet me këngën “Feel the pasion”, varianti anglisht i “Kënga ime”, fituese e edicionit të 49-të Festivalit të RTSH-së. Kënga me tekst të Sokol Marsit dhe Shpëtim Saraçit, u mendua që për skenën e Eurovizionit të përshtatej në variantin anglisht, ashtu siç ka ndodhur me shumicën e këngëve që kanë përfaqësuar vendin tonë në këtë festival europian të këngës.

Gjatë provave, por edhe në komentet e mediave ndërkombëtare, këngëtarja vlonjate është vlerësuar për vokalin e saj, ndërkohë që paraqitja skenike ngjall kureshtje përpara natës gjysmëfinale. Në provat e dyta në skenën e Dyseldorfit, Aurela Gaçe ka zbuluar edhe fustanin që do të mbajë të veshur sot. Varianti i përafërt i tij u pa që në videoklipin shoqërues të këngës, por ai me të cilin do të ngjitet sot do të ketë pak ndryshime.

Është një fustan rozë, jo i gjatë deri në fund të këmbëve, mbi të cilin është punuar shqiponja. Stilistja Mirela Nurçe ndoshta sot do t’i ketë shtuar ndonjë element më tepër, por në thelb mbetet po ai. Nurçe nuk ka zgjedhur t’i japë ngjyrat kuq e zi, ndërkohë që të veshur me të zeza, me ndonjë detaj në ngjyrë të kuqe, do të jenë tre back-vokalistë, të sugjeruar nga këngëtarja tjetër e njohur shqiptare, Eda Zari që jeton aktualisht në Dyseldorf.

Gjithashtu, në skenë këngëtarja do të shoqërohet me kitarë nga Bledar Sejko, kurse në bateri do të jetë Emiliano Dhimo. Efektet skenike do të kenë të bëjnë vetëm me ndriçimin, ku dallohen ngjyra e kuqe dhe e bardha, ku të paktën nga pamjet e provave duket sikur orientimi i tyre do të japë imazhin e krahëve të shqiponjës. “Kënga sjell diçka nga Shqipëria. Ne të gjithë marrim frymë në këtë botë të madhe, por ne rritemi në vende të ndryshme dhe kemi ende dallimet tona të vogla që na bëjnë individualë”, - ka thënë Aurela Gaçe për sajtin zyrtar të Eurovizionit. Kjo është hera e parë që këngëtarja vlonjate shkel në skenën e Eurovizionit.

Rikthimi në Festivalin e Këngës në RTSH, ku ajo ka kënduar për disa vite dhe ka qenë edhe fituese e çmimeve të para, ia dha këtë mundësi. Duke qenë se Shqipëria vitin e shkuar nuk mori pikët e mjaftueshme për t’u kualifikuar në natën gjysmëfinale, Aurelës do t’i duhet të konkurrojë për këtë fazë.

Si çdo vit, votimi nuk mund të bëhet nga brenda Shqipërisë, por nga vendet e tjera, të cilët i vlerësojnë konkurentët nga 1 deri në 12 pikët maksimale. Mbetet të shpresojmë që performanca e Aurelës të fitojë votat e publikut për të kaluar në natën finale të 14 majit. Eurovizioni këtë vit organizohet në Gjermani, vendi fitues i edicionit të shkuar.