Përplasjet vonojnë numërimin e votave në Tiranë

nga **● E.D.W-M ●** Mon May 16, 2011 10:23 pm

Beteja për kryetarin e baskisë së Tiranës ndërmjet Lulzim Bashës dhe Edi Ramës ka hyrë në fazën finale, por ajo gjithnjë e më shumë po i ngjan ndeshjeve finale në NBA, kur dy-tre minutat e fundit, për shkak të ndërprerjeve shumë të shpeshta, zgjasin pothuaj sa gati tërë ndeshja.
Vendimi i KZAZ nr. 49, ku po numërohen votat e Njësisë 5 në kryeqytetin shqiptar, që të mos lejojë hyrjen në vendnumërim të personave pa autorizim, ka çuar në ndërprerjen e procesit të numërimit.
Nga ky vendim janë nxjerrë jashtë edhe deputetët e forcave politike, të cilët nuk kishin autorizim.
Deputeti socialist, Erion Braçe ka denoncuar një skemë manipulimi, sipas tij, për nxjerrjen e sa më shumë votave të pavlefshme.
Ai ka akuzuar drejtpërdrejt kryeministrin Sali Berisha, kandidatin e “Aleancës për qytetarin”, Lulzim Basha, dhe kreun e KQZ-së, Arben Ristani, se po tentojnë të manipulojnë procesin.
“Kur kutitë, pavarësisht me një ngadalësim të tejskajshëm, po shkojnë drejt fundit, po vëmë re me shqetësim një skemë të qartë manipuluese që synon të nxjerrë sa më shumë fletë të pavlefshme për çdo kuti votimi ku shqiptarët kanë materializuar vullnetin e tyre. Kjo skemë manipuluese është e urdhëruar nga Sali Berisha, nga kandidati i tij humbës dhe në fund nga Arben Ristani”, tha Braçe.
Në qendrën e votimit të njësisë nr. 5, sipas raporteve të fundit pas orës 22, kanë mbetur pa u numëruar edhe 11 kuti votimi. Deri në këto momente, kandidati Lulzim Basha udhëheq me 122 700 vota të numëruara në favor të tij, derisa Edi Ramës i janë numëruar 121 975 vota.