Si t’i dalloni nishanet e rrezikshme

- Duke qenë se rrezet e diellit ndikon dukshëm në paraqitjen e melanomave, vera është stina e shtimit të përkujdesjes ndaj nishaneve. Kontrollojini ato vetë sipas katër kritereve themelore.
Nishanet janë gjithnjë aty, dalin gjatë gjithë jetës, më së shumti na shfaqen gjatë adoleshencës, e më së shumti na brengosin gjatë stinës së verës.
Personat me ten më të bardhë janë më të ekspozuar ndaj rrezikut nga paraqitja e melanomave. Po ashtu në grupin e të rrezikuarve janë edhe personat me më shumë se 50 nishane në trup, ata që kanë nishane të cilat ndryshojnë ngjyrën, ata, anëtarët e familjes së të cilëve kanë pasur melanomë, ata të cilët rrinë jashtë shpesh dhe pa mbrojtje, ata që shpesh vizitojnë solariumet dhe njerëzit të cilët në fëmijëri ose rini kanë pasur shpesh të djegura nga rrezet e diellit.
Nëse dëshironi të jeni të sigurt se nishanet tuaja nuk kalojnë nëpër një ndryshim të rrezikshëm bëjeni dermatoskopinë, një teknikë e diagnostikimit me kamerë, që nuk shkakton dhimbje, e cila vizualisht zmadhon nishanin edhe deri në 100 herë. Kështu do të fitoni një pasqyrë të cilën mund ta përdorni për të krahasuar dhe përcjellë pamjen e nishaneve në periudhën pasuese.
Para dermatoskopisë mund ta bëni një kontroll të thjeshtë edhe vetë, sipas kritereve të mëposhtme:

Asimetria: A janë nishanet tuaja asimetrike? Shumica e nishaneve në zhvillim janë asimetrike.

Skajet: A kanë nishanet tuaja skaje të rregullta? Skajet e melanomave në zhvillim shpesh janë të parregullta dhe të dhëmbëzuara.

Ngjyra: A janë nishanet tuaja njëngjyrëshe? Ndryshimi i ngjyrës dhe pigmentet jo të njëtrajtshme mund të flasin për një melanomë.

Diametri: A kanë nishanet tuaj diametër më të vogël se 6 milimetra? Melanomat zakonisht kanë diametër më të madh.

Ndryshimi: A tregojnë nishanet tuaja ndryshim sipas cilitdo kriter të përmendur më lart?

Mund të dyshoni për melanomë me secilin ndryshim të nishaneve sipas një ose më shumë kritereve të cekura më lart, ose në rast të paraqitjes së gjakrrjedhjes edhe nëse nuk keni pasur lëndim, të ënjtur, skuqje ose të kruara.