Ndërrimi i Hënës ndikon në shëndet

Besimi që ndërrimi i Hënës ndikon në shëndet nuk është edhe aq i pabazuar. Një varg hulumtimesh shkencore ofrojnë dëshmi interesante për ndikimin e Hënës në gjendje të ndryshme mjekësore.

Matthew Silverstone në librin e tij "Blinded By Science", kushtuar mjekësisë alternative, pohon se gravitacioni i Hënës ndikon edhe në ujin e trupit tonë, ritmin e gjumit dhe shfaqjen e pagjumësisë. Ai sugjeron edhe në atë që Hëna kontrollon ciklin menstrual të femrave. Këtë muaj në “Urology Journal" është publikuar rezultati i studimit të 1.481 pacientëve te të cilët u tregua se dhimbja e shkaktuar nga guri në veshkë rritet gjatë periudhës së Hënës së plotë.

Ndikimi i Hënës nganjëherë quhet edhe “hipoteza e Transilvanisë”. Gjatë është spekuluar se, përveç ndikimit përmes forcës së gravitacionit, Hëna ndikon edhe duke ndryshuar fushën magnetike tokësore. Skeptikët i përgjigjen kësaj se ndikimi i Hënës në këtë fushë është shumë i dobët. Megjithatë, në revistën “Pulse”, dr. Peter Perkins, ka intervistuar 79 kolegët e tij britanikë dhe ka arritur te të dhënat se gjatë Hënës së plotë, ka tre për qind më shumë thirrje për ndihmë të shpejtë. Gjatë Hënës së re numri i thirrjeve bie për gjashtë për qind.

Megjithatë, ndoshta e tëra ka të bëjë me diçka të thjeshtë – nivelin e dritës. Drita të cilën e jep Hëna e plotë është 16 herë më e fortë krahasuar me fazat e tjera lunare. Hulumtuesit nga Londra kanë theksuar se numri i sulmeve epileptike bie kur Hëna është më e ndriçueshme. Ata konsiderojnë se ndriçimi ndikon në hormonin melatoninë, i cili lirohet gjatë natës dhe është i përfshirë në këtë proces.