Kaltrina kthen të fejuarin në Kosovë

Pjesa dërrmuese e vajzave e dëshirojnë jetën në Perëndim, mirëpo kjo nuk po ndodh për këngëtaren tonë, Kaltrina Selimi, e cila ka vendosur që të fejuarin e saj, Dritonin, ta kthejë nga Londra për të jetuar në Kosovë. Këtë kërkesë ajo të fejuarit të saj ia ka bërë para disa ditësh, kurse Dritoni i është përgjigjur pozitivisht.

“Ndihem shumë e lumtur që Dritoni ka pranuar ta lërë Londrën për të jetuar këtu në Kosovë, bashkë me mua. Normalisht se fillimi i jetës së tij këtu do të jetë paksa i vështirë për faktin se tashmë është mësuar me jetën në Londër. Mirëpo, një plus i madh për ambientimin e tij këtu janë edhe prindërit e tij, të cilët jetojnë në Kosovë. Kjo më bën të ndihem edhe më mirë, sepse nuk do të mërzitet për njerëzit më të dashur të tij”, ka thënë ajo për “Zërin”.

Kaltrina tani për tani ende nuk ka marrë ndonjë vendim për martesë gjatë këtij viti, duke pohuar se çdo gjë do të rrjedhë me kohë dhe me plan.

“Sa i përket martesës ende nuk kemi vendosur asgjë me Dritonin. Kur të vijë këtu do të shohim, por asgjë konkrete nuk ka në këtë aspekt”, shtoi ajo. Sukseset në këngë Kaltrinës po i rriten dita ditës. Videoklipi “Hot”, i publikuar para pak ditësh, asaj i ka sjellë shumë fat.

“Sapo kam lansuar këngën time “Hot” bashkë me klip dhe po pëlqehet mjaft në publik. Jam shumë e kënaqur që bashkëpunova me Don Arbas dhe Bekën, i cili ma bëri tekstin e këngës”, shtoi Kaltrina, e cila është në përgatitje edhe të disa projekteve të reja.